अर्जेन्टिनालाई हराउँदै स्पेनले जित्यो विश्वकप उपाधि

नयाँ विकल्प संवाददाता
प्रकाशित मिती: २०८३ श्रावण ४, ०८: १९

काठमाडौं : स्पेन सन् २०२६ को फिफा विश्वकप २०२६ को च्याम्पियन बनेको छ।

सन् २०१० मा अतिरिक्त समयमा गोल गर्दै पहिलो पटक विश्वकप जितेको स्पेनले १६ वर्षपछि आइतबार राति सोही इतिहास दोहोर्‍याएको हो। अर्जेन्टिनालाई अतिरिक्त समयमा १-० गोलले पराजित गर्दै स्पेन दोस्रो पटक विश्व च्याम्पियन बनेको हो।

वैकल्पिक खेलाडीका रूपमा मैदान छिरेका फेरान टोरेस स्पेनका लागि नायक बने। उनले खेलको १०६औँ मिनेटमा अर्जेन्टिनी गोलकिपर एमिलियानो मार्टिनेजलाई छक्याउँदै गोल गरे। यो गोलले लिओनल मेसी र अर्जेन्टिनाको लगातार दोस्रो पटक विश्वकप जित्ने सपनालाई चकनाचुर पारिदियो।

३९ वर्षीय मेस्सीका लागि यो प्रतियोगिताकै सबैभन्दा शान्त खेल रह्यो। खेलको सुरुवाती १५ मिनेटमा उनले केवल एक पटक बल छोएका थिए, त्यो पनि खेल सुरु गर्दाको ‘किक-अफ’ मा मात्र थियो।

अर्जेन्टिनाले पहिलो हाफमा एउटा पनि प्रहार गर्न सकेन। स्पेनले खेलभरि उत्कृष्ट प्रदर्शन गर्दै दबाब बनाए पनि टोरेसको गोल अघिसम्म निर्णायक अग्रता लिन सकेको थिएन।

खेलको बीचमा मडोना, बीटीएस, जस्टिन बिबर र साकिरा जस्ता कलाकारहरूको २७ मिनेट लामो ‘हाफ-टाइम शो’ का कारण खेल केही समय रोकिएको थियो।

खेल अतिरिक्त समयतर्फ धकेलिँदै गर्दा अर्जेन्टिना दबाबमा पर्‍यो। अर्जेन्टिनाका मिडफिल्डर एन्जो फर्नान्डेजले स्पेनका युवा डिफेन्डर पाउ कुबार्सीलाई खराब फाउल गरेपछि दोस्रो पहेँलो कार्ड पाउँदै मैदानबाट बाहिरिए। न्युजर्सीस्थित मेटलाइफ स्टेडियममा भएको उक्त खेलमा अर्जेन्टिना १० खेलाडीमा सीमित भयो।

एक खेलाडी बढी हुनुको फाइदा उठाउँदै अतिरिक्त समयको ३० मिनेटमा स्पेनले पूर्ण नियन्त्रण जमायो। निकोलस ओटामेन्डीमाथि फाउल भएको भन्दै स्पेनको एउटा गोल रद्द गरिए पनि अन्त्यमा टोरेसको गोल नै जितका लागि पर्याप्त बन्यो।

स्पेनले खेलभरि अर्जेन्टिनाको रक्षापंक्तिमाथि निरन्तर आक्रमण गरिरह्यो। क्वाटरफाइनलमा बेल्जियम र सेमिफाइनलमा फ्रान्सलाई हराए जस्तै यस खेलमा पनि पेड्रो पोरोको भूमिका महत्वपूर्ण रह्यो।

सम्बन्धित समाचार

प्रतिनिधिसभामा नियमापत्ति दुरुपयोग नगर्न सभामुख अर्यालको चेतावनी

२०८३ श्रावण ४, ०८: १९

काठमाडौं : प्रतिनिधिसभाका सभामुख डोलप्रसाद अर्यालले सदनमा हुने नियमापत्तिलाई औचित्यपूर्ण र नियमसम्मत बनाउन सांसदहरूलाई निर्देशन दिएका छन् । बिहीबारको बैठकमा...