नेपालमा काेराेना संक्रमितकाे संख्या हाल सम्म कै उच्च

शुक्रबार थपिए २७ सय २२ कोरोनाका नयाँ संक्रमित, काठमाडौंमा थप १६ सय ३८ संक्रमित

नयाँ विकल्प,
काठमाडौं – नेपालमा कोरोना भाइरसबाट विगत २४ घण्टामा हालसम्मकै सबैभन्दा बढी दुई हजार सात सय २२ जना संक्रमित भएका छन् ।

स्वास्थ्य तथा जनसंख्या मन्त्रालयका प्रवक्ता प्राडा जागेश्वर गौतमले देशभरका विभिन्न प्रयोगशालामा गरिएको परीक्षणमा पछिल्लो २४ घण्टामा यति धेरै संक्रमित थपिएको जानकारी दिए ।

शुक्रबार थपिएका संक्रमितसँगै देशभर कुल संक्रमितको संख्या ८२ हजार ४ सय ५० पुगेको छ । देशभर सक्रिय संक्रमितको संख्या भने २१ हजार २ सय ३४ रहेको छ । संस्थागत आइसोलेसनमा नौ हजार चार सय ७४ र होम आइसोलेसनमा ११ हजार सात सय सय ६० जना रहेका छन् ।

पछिल्लो २४ घण्टामा तीन हजार तीन सय सात जना संक्रमित निको भएर घर फर्किएका छन् । अहिलेसम्म निको हुनेको संख्या ६० हजार ६ सय ९६ पुगेको छ । पछिल्लो २४ घण्टामा १४ हजार सात सय ३९ जनाको पीसीआर परीक्षण गरिएको थियो ।

मृत्यु हुनेको सख्या पाँच सय २२ पुग्यो

बितेको २४ घण्टामा नेपालमा कोराना संक्रमणबाट थप ११ जनाकोे मृत्यु भएको छ । योसँगै नेपालमा कोरोना संक्रमणबाट ज्यान गुमाउनेको संख्या पाँच सय २० पुगेको छ ।

काठमाडौमा थपिए १६ सय ३८ संक्रमित

मुलुकको राजधानी काठमाडौं उपत्यकामा एकै दिन हालसम्मकै सबैभन्दा बढी संक्रमित थपिएका छन् । स्वास्थ्य तथा जनसख्या मन्त्रालयका अनुसार पछिल्लो २४ घण्टामा उपत्यकामा एक हजार छ सय ३८ जना थप संक्रमित भेटिएका छन् ।

काठमाडौं जिल्लामा चार सय ७० महिला, आठ सय १० पुरुषसहित एक हजार दुई सय ८० जना, ललितपुर जिल्लामा ७७ महिला र ८५ पुरुषसहित एक सय ६२ जना र भक्तपुरमा ८० महिला र एक सय १६ पुरुषसहित एक सय ९६ जनामा संक्रमण पुष्टि भएको हो ।