कोरोना संक्रमित एकै दिन ५ हजार थपिए १४ को निधन

स्वास्थ्य मन्त्रालयको चेतावनीः डिष्चार्ज हुनेभन्दा संक्रमित थपिए, अप्ठ्यारो स्थिति आउन सक्छ

नयाँ विकल्प

काठमाडौं – सरकारले सावधानी अपनाउन आग्रह मात्रै गर्ने तर सम्भावित संक्रमण रोकथाम गर्न उचित कदम नचाल्दा कोभिड १९ को संक्रमणले मुलुकलाई अप्ठ्यारो परिस्थितिमा लौजान सक्ने सरोकारवाला निकाय र विशेषज्ञले बताउन थालेका छन् ।

पछिल्लो साता संक्रमणबाट बच्न र बचाउन उचित कदम नचाल्दा मुलुकमा कारोना संक्रमितको संख्या डबल डिजिटमा बढ्न थालेका छ । शनिबार मात्र पछिल्लो २४ घण्टामा पाँच हजार आठ जना संक्रमित थपिएसँगै अप्ठ्यारो परिस्थिति आएको सरकारले नै स्वीकार गरेको छ ।

स्वास्थ्य तथा जनसख्या मन्त्रालयले शनिबार आयोजना गरेको नियमित प्रेस ब्रिफिङमा मन्त्रालयका प्रवक्ता प्राडा. जागेश्वर गौतमले नेपालमा नेपालमा पछिल्ला केही दिनदेखि संक्रमितको सख्या निको हुनेको तुलनामा धेरै भएका कारण अप्ठ्यारो स्थिति आईलाग्ने बताएका हुन् ।

नेपालका शनिबारसम्म सक्रिय संक्रमितहरुको संख्या बढेर ३० हजार आठ सय पुगेसँगै अस्पतालका आइसोलेसन सेन्टर, आईसीयू र भेन्टिलेटर भरिँदै गएका छन् । शनिबार एकै दिन पाँच हजार आठ जना संक्रमित थपिएसँगै नेपालमा हाल संक्रमितको कुल संख्या एक लाख पाँच हजार छ सय ८४ पुगेको छ ।

देशका ५८ वटा ल्याबबाट १९ हजार ३ सय २० जनाको पिसिआर परीक्षण गर्दा पाँच हजार आठ जना संक्रमित थपिदा कोरोनामुक्त हुनेहरूको संख्या १२ सय २९ मात्र छ । संस्थागत आइसोलेसनमा १३ हजार छ सय ५४ जना रहेका छन् ।

स्वास्थ्य तथा जनसंख्या मन्त्रालयका अनुसार प्रदेश १ मा १ हजार ४ सय ७७, प्रदेश २ मा ५ सय ९ जना, बागमती प्रदेशमा ९ हजार १ सय ३ जना, गण्डकी प्रदेशमा ६ सय २५ जना, लुम्बिनी प्रदेशमा १ हजार २ सय ७२ जना, कर्णाली प्रदेशमा ५ सय ५४ जना र सुदूरपश्चिम प्रदेशमा १ सय १४ जना संक्रमित छन् ।

होम आइसोलेसनमा रहने संक्रमितको संख्या १७ हजार १ सय ६४ जना रहेको छ ।