कोरोनाले मोरङमा एकै दिनमा सात जनाको मृत्यु

नयाँ विकल्प
प्रकाशित मिती: २०७७ कार्तिक ४, १६: ५९

नयाँ विकल्प,

काठमाडौं – मोरङ जिल्लाको विराटनगर महानगरपालिकासहित अन्य भेगका सात जनाको एकै दिन कोरोना भाइरसको संक्रमणको कारण निधन भएको छ । जिल्लामा पछिल्लो २४ घण्टामा मृत्यु भएका संक्रमितको संख्या अहिलेसम्मकै धेरै हो ।

विराटनगरका विभिन्न अस्पतालमा उपचाररत पाँच महिला र दुई पुरूषको मृत्यु भएको छ । कोशी अस्पताल कोभिड–१९ उपचार केन्द्रमा तीन जना, विराट नर्सिङ होम, न्युरो, विराट र नोबेल शिक्षण अस्पतालमा एक–एक जनाको मृत्यु भएको छ ।

मोरङ कटहरी गाउँपालिका–२ आदर्श टोलकी २१ वर्षीया युवतीकोे, विराटनगर महानगरपालिका–१२ की ६४ वर्षीया वृद्धाको र सुनसरीको इटहरी उपमहानगरपालिका –५ का ३८ बर्षे पुरुषको कोशी कोभिड उपचार केन्द्रमा उपभारका क्रममा मृत्यु भएको छ ।

मोरङको रंगेली नगरपालिका–३ का ८५ वर्षीय संक्रमित वृद्धको विराट नर्सिङ होममा,विराटनगरकै न्युरो अस्पतालमा एक बृद्धको, महानगरपालिका–१० नंम्वर वडाकी ६४ वर्षीया महिलाको न्युरो अस्पतालमा मृत्यु भएको हो ।

महानगरपालिका–७ की ६९ वर्षीया वृद्धाको पनि नोबेल शिक्षण अस्पतालमा मृत्यु भएको छ । उपचारका क्रममा बिहान ८ बजेतिर उनको मृत्यु भएको अस्पतालका व्यवस्थापक नारायण दाहालले जानकारी दिएका छन् ।

मोरङको बूढीगंगा गाउँपालिकास्थित विराट शिक्षण अस्पतालको आइसोलेसनमा ७६ वर्षीया संक्रमित वृद्धाको पनि मंगबार बिहान निधन भएको छ ।