सहमतिको आधारमा तोकिएकै मितिमा अब महाधिवेशन हुन्छः सभापति देउवा

नयाँ विकल्प
प्रकाशित मिती: २०७८ असार १९, २२: ३६

नयाँविकल्प
काठमाडौं – नेपाली कांग्रेसका सभापति शेरबहादुर देउवाले पार्टीको महाधिवेशन गराएरै छाड्ने बताएका छन् । आफू हार्ने भए पनि महाधिवेशन गराएरै छाड्ने आफूनिकट पदाधिकारी र केन्द्रीय सदस्यहरुसँगको छलफलमा यस्तो जिकीर गरेका हुन् ।

देउवाले पदाधिकारी बैठकमा क्रियाशील सदस्यताबारे बनेको सहमतिको जगमा महाधिवेशन तोकिएकै मितिमा सम्पन्न हुनेगरी सबैले आ–आफ्नो जिम्मेवारी पूरा समेत निर्देशन दिए ।

उनले सदस्यता छानबिन समितिमा रहेका नेताहरुलाई अधिकतम सहमति जुटाउन र विवाद नटुंगिए स्थगित गरेर अगाडि बढ्नसमेत निर्देशन दिएका छन् ।

बैठकमा उपसभापतिद्वय विमलेन्द्र निधि र विजयकुमार गच्छदार, महामन्त्री पूर्णबहादुर खड्का, सह-महामन्त्री डा.प्रकाशशरण महत, सदस्यता छानबिन समितिका संयोजक रमेश लेखक र सदस्यहरु रहेका थिए ।
‘
कांग्रेसको महाधिवेशन आगामी भदौ १६ देखि १९ गतेसम्म काठमाडौंमा हुँदैछ । महाधिवेशन कार्यतालिका अनुसार आइतबारसम्म क्रियाशील सदस्यता छानबिन समितिले केन्द्रीय समितिलाई क्रियाशील सदस्यताको सूची बुझाउनुपर्नेछ ।