दुई किशोरी बलात्कार गरेको अभियोगमा ९ जना पक्राउ

नयाँ विकल्प संवाददाता
प्रकाशित मिती: २०७९ कार्तिक १७, १७: ४७

बुटवल । रुपन्देहीको कञ्चन गाउँपालिका –२ घर भएका दुई जना किशोरीमाथि सामुहिक बलात्कार गरेको आरोपमा प्रहरीले नौ जनालाई पक्राउ गरेको छ ।

कञ्चन गाउँपालिकास्थित गोफ्लापुरमा बुधबार राति अपहरण १५ र १६ वर्षे दुई युवतीलाई सामूहिक बलात्कार गरेको आरोपमा प्रहरीले पक्राउ गरी विहीबार सार्वजनिक गरेको हो ।

पक्राउ पर्नेमा सैनामैना नगरपालिका–१० का १८ वर्षका बबी पाण्डे, २६ वर्षका रामबहादुर बिक, सैनामैना–११ बनकट्टिकी १९ वर्षका पदम कार्की र गैडहवा गाउँपालिका–८ का १८ वर्षे राहुल परियार रहेको जिल्ला प्रहरी कार्यालय रुपन्देहीले जनाएको छ ।

गाउँमा बुधबार बेलुका लागेको सांस्कृतिक कार्यक्रम हेरेर फर्कने क्रममा ती किशोरीलाई १०–१२ जनाको समूहले गैडहवा गाउँपालिका–२ कुलीचौरस्थित कञ्चन खोलाको बगरमा सामूहिक बलात्कार गरेको प्रहरीले जनाएको छ ।

घटनामा संलग्न अन्यको खोजी भइरहेको र पक्राउ परेकाको बयानका आधारमा घटनामा संलग्न अन्यको पहिचान खुले पनि प्रहरीले नाम गोप्य राखेको छ ।