स्वतन्त्र उम्मेदवारी दिएका रेशम चौधरीका बुवा लालबीर बिजयी

नयाँ विकल्प संवाददाता
प्रकाशित मिती: २०७९ मंसिर ७, १६: ४१

गुलरिया । बर्दियाको निर्वाचन क्षेत्र नम्वर २ बाट प्रतिनिधि सभा सदस्यमा स्वतन्त्र उम्मेदवार लालबीर चौधरी बिजयी भएका छन् ।

विजयी भएका चौधरी २०७२ साल भदौमा भएको टिकापुर काण्डका मुख्य योजनाकार भएको अभियोगमा अदालततको फैसलापछि हाल जेल जीवन बिताई रहेका नागरिक उन्मुक्ति पार्टीका नेता रेशम चौधरीका बुवा हुन् ।

बर्दिया –२ बाट चौधरीले उम्मेदवारी दिए पनि निर्वाचन आयोगले उम्मेदवारी खारेज गर्न सक्ने आशंका गरेर आफ्नै पीतालाई स्वतन्त्र उम्मेदवारी दिन लगाएका थिए । रेशमको उम्मेदवारी निर्वाचन आयोगले खारेज गरिदिएपछि लालबीरलाई सो पार्टीले मत मागेको थियो ।

बर्दिया –२ बाट सत्तारुढ गठबन्धनले नेकपा (माओवादी केन्द्र)का सुरेश पन्थलाई उम्मेदवार बनाएको थियो । चौधरीले २६ हजार ५२० मत ल्याएर विजयी हुँदा निकटतम प्रतिद्वन्द्वी माओवादीका पन्थले २६ हजार ३८४ मत प्राप्त गरे । बिजयी भएका चौधरीले प्रतिष्पर्धीभन्दा १३६ मत बढी ल्याएका थिए।

बर्दिया २ बाट प्रतिष्पर्धामा उत्रिएका नेकपा एमालेका पंकजसिंह राठौरले १६ हजार ९० मत प्राप्त गरे भने राप्रपाका विनय रावलले १३ हजार २९२ मत प्राप्त गरे । क्षेत्र नम्बर–२ मा एक लाख ५२ हजार ६२ मतदाता रहेकामा ९२ हजार १९९ मत खसेको थियोे । पाँच हजार ३८७ मत बदर भएको निर्वाचन कार्यालयले जनाएको छ ।