राप्रपाले पशुपति र बुद्धीमानलाई सांसदमा सिफारिस गर्दा प्रकाशचन्द्र छुटे

Lila Khanal
प्रकाशित मिती: २०७९ मंसिर २४, २२: ५८

काठमाडौं । राष्ट्रिय प्रजातन्त्र पार्टीले समानुपातिक प्रणालीबाट सांसदको लागि आफ्नो भागमा परेको ७ सिटमा सिफारिस गर्दा पुरुष कोटाबाट पार्टीका पूर्बअध्यक्ष पशुपति शम्शेर जबरा र पार्टीका उपाध्यक्ष बुद्धीमान तामाङलाई चयन गरेको छ ।

राप्रपाको शनिबार भएको कार्यसम्पादन समितिको बैठकले समानुपातिक पद्धतिमा पाएको ७ मध्ये २ पुरुषमा खस आर्यबाट राणा र आदिवासी जनजातिबाट तामाङको नाम टुंगो लगाएको हो । राप्रपाले प्रतिनिधि सभामा प्रत्यक्षबाट ७ र समानुपातिक प्रणालीबाट ७ सिट पाएको थियो ।

पार्टी नेता डा. प्रकाशचन्द्र लोहनीलाई समेत समानुपातिक तर्फ सिफारिस गर्न दबाब आए पनि अध्यक्ष राजेन्द्र लिङ्देनले समाबेसी बिरोधी सन्देश जाने भन्दै आदिवासी जनजाति वा मधेशी क्लस्टरको प्रतिनिधित्व हुनुपर्ने अडान लिएका थिए ।

राप्रपाले खस आर्य कोटाबाट जबरासहित रोशन कार्की र गीता बस्नेतलाई आदिबासी जनजाति कोटाबाट तामाङसहित बिना लामा, मधेशीबाट बिना जयसवाल र दलितबाट अनिता नेपालीको नाम प्रतिनिधि सभा सदस्यको लागि निर्वाचन आयोगमा सिफारिस गरेको हो ।

प्रतिनिधिसभामा ३३ प्रतिशत महिला सहभागिता सुनिश्चित गर्न राप्रपाले समानुपातिक पद्धतिबाट २ जना पुरुषमात्र चयन गर्नु पर्ने बाध्यता थियो ।