मध्यावधि निर्वाचन रोक्न विद्रोहीलाई कोशीमा समर्थन गरेको ओलीको दाबी

नयाँ विकल्प राजनितिक व्यूराे
प्रकाशित मिती: २०८० आश्विन २८, १९: ५०

प्युठान। नेकपा एमालेका अध्यक्ष केपी शर्मा ओलीले कोशी प्रदेशमा मध्यावधि निर्वाचन रोक्न आफूहरुले नेपाली कांग्रेसको बिद्रोही समूहलाई मुख्य मन्त्रीमा समर्थन गरेको बताएका छन् ।

प्युठानको बिजुवारमा नेकपा एमाले प्युठानद्वारा आयोजित अगुवा कार्यकर्ता भेटघाट कार्यक्रमलाई सम्बोधन गर्दै अध्यक्ष ओलीले मध्यावधिमा जाँदा मुलुकले ठूलो आर्थिक व्यवभार बेहोर्नु पर्ने भएकाले मध्यावधि निर्वाचन रोक्न कांग्रेस बिद्रोहलाई समर्थन गर्नु परेको बताएका हुन्।

ओलीले भने, ‘देशको आर्थिक अवस्था नाजुक छ, मध्यावधिमा जाँदा देशलाई ठूलो खर्च हुने देखेर मध्यावधिबाट मुलुकलाई जोगाउन कांग्रेसको विद्रोहलाई समर्थन ग¥यौं । तेस्रो भएको माओवादीलाई जताततै बोकेर हिँडेपछि सबैतिर कांग्रेसका नेता कार्यकर्ता आक्रोशित छन्, अति भएर कोशी प्रदेशमा कांग्रेसका केही साथीहरुले विद्रोह गर्नुभएको हो।’

उनले केन्द्र र प्रदेशमा सत्ताका लागि भएको अपवित्र गठबन्धनको सबैतिर संघीयताको वितृष्णा जगाएको बताए। ओलीले कोशीमा कांग्रेसमा आएको विद्रोहले गठबन्धनलाई धक्का दिएको दाबी गरे।

कोशी प्रदेशमा नेपाली कांग्रेसको शेखर कोइराला समूहका ८ जनाले विद्रोह गरेर एमालेका सांसदको समेत समर्थनमा केदार कार्की मुख्यमन्त्री भएका छन्।