आनन्दवन अस्पतालमा ट्रमा र इमरजेन्सी विङ्ग सञ्चालनमा

नयाँ विकल्प विशेष संवाददाता
प्रकाशित मिती: २०८० माघ १५, १३: ३२

ललितपुर । दक्षिण ललितपुरबासीले सस्तो र शुलभ स्वास्थ्य सेवा पाउने भएका छन् । ललितपुरको गोदावरी नगरपालिका–६ टीकाभैरबमा अवस्थित आनन्दवन अस्पतालले ट्रमा सेन्टर र इमरजेन्सी विङ्ग सञ्चालनमा ल्याएपछि अब काठमाडौंसम्म जानुपर्ने र महङ्गोमा उपचार गर्नुपर्ने बाध्यताबाट दक्षिण ललितपुरबासीलाई छुट्कारा पाउने भएका छन् ।

मुख्यतय कुष्ठरोगको उपचारमा बढि केन्द्रित रहेको आनन्दवनले ट्रमा सेन्टर र इमरजेन्सी विङ्ग संचालन गरेपछि अन्य स्वास्थ्य सेवा पनि विस्तार गरेकाले उपचारका लागि टाढा जानुपर्ने बाध्यता हटेको छ ।

दक्षिण ललितपुरसँगै सिमा जोडिएका मकवानपुर तथा काभ्रे जिल्लाका आर्थिक अभावले जेलिएका जनताले सस्तो मूल्यमा उचित स्वास्थ्य सेवा पाउने भएको अस्पताल प्रशासनले जनाएको छ ।

आइतबार ‘७१ औँ विश्व कुष्ठरोग दिवस’ को अवसर पारी अन्य स्वास्थ्य सेवा पनि सस्तो सुलभ ढंगले दिने हेतुले ट्रमा सेन्टर र इमरजेन्सी विङ्ग सञ्चालनमा ल्याएको हो । सो सेवाको एक कार्यक्रमका बीच गोदावरी नगरपालिकाका प्रमुख गजेन्द्र मर्हजनले शुभारम्भ गरे ।

सन् १९५७ मा दि लेप्रोसि मिसन अन्तराष्ट्रियको आर्थिक सहयोगमा स्थापित अन्तराष्ट्रिय गैरसरकारी संस्थाको रुपमा संचालन हुदैआएको र हाल सन् २००५ देखि दि लेप्रोसि मिसन नेपाल भन्ने गैरसरकारी संस्थाद्धारा संचालित कुष्ठरोगको बिषेशज्ञ अस्पताल हो ।

यस संस्थामा कुष्ठरोगको लागि ८० बेड निशुल्क र ३० बेड हाडजोर्नि तथा अन्य रोगको लागि सशुल्क गरी जम्मा ११० बेड संचालित छन् । आइतबारबाट दक्षिण ललितपुरका जनमानसलाई मध्यनजर गर्दै ४० बेड थप गरेको अस्पतालले जनाएको छ ।