रास्वपाका सांसद र पदाधिकारीविरुद्ध अदालतको अवहेलना मुद्दा दर्ता हुँदै

नयाँ विकल्प संवाददाता
प्रकाशित मिती: २०८१ कार्तिक २७, १६: ३४

काठमाडौं। अदालतको अनुमतिले नेपाल प्रहरीको हिरासतमा रहेका राष्ट्रिय स्वतन्त्र पार्टी (रास्वपा)का सभापति तथा प्रतिनिधि सभा सदस्य रवी लामिछानेको पक्षमा आन्दोलन गर्ने रास्वपाका सांसद र पदाधिकारीहरुविरुद्ध अदालतको अवहेलना मुद्धा दर्ता हुने भएको छ।

सर्वोच्च अदालतका न्यायाधीश विनोद शर्माको इजलासले यसअघि सर्वोच्च प्रशासनबाट दरपिठ गरेको निवेदन मंगलबार दर्ता गर्न आदेश गरेपछि सो मुद्धा अघि बढ्ने भएको हो।

अधिवक्ता अनुपम भट्टराईले अनुसन्धानमा रहेको चरणमै अदालतलाई दबाब दिने उद्देश्यले अभिव्यक्ति दिने, आन्दोलन गर्ने र आम जनतालाई उतारेर न्याय प्रक्रियामा अवरोध गर्न खोजेको दाबी गर्दै सर्वोच्चमा अदालतको अवहेलना निवेदन पेस गरेका थिए।

सो निवेदन सर्वोच्च प्रशासनले दरपीठ गरिदिएको थियो। त्यसपछि अधिवक्ता भट्टराई दरपीठविरुद्ध पुनः सर्वोच्चमा गएका थिए।

सो रिटमाथि सुनुवाइ गर्दै न्यायाधीश शर्माको इजलासले दरपीठको आदेश बदर गरिदिएको हो। आदेश वदर भएसँगै रास्वपाका सांसद र पदाधिकारीविरुद्ध अदालतको अवहेलना मुद्दा दर्ता हुने निश्चित भएको हो।

अधिवक्ता भट्टराईले रास्वपाका केन्द्रीय पदाधिकारी, बागमती प्रदेशका प्रदेश सभापति र २० जना सांसदविरुद्ध अदालतको अवहेलनाको निवेदन दिएका थिए।