जोरपाटीबाट बैंकिङ कसुरमा ४८ लाख जरिवाना तोकिएका महत पक्राउ

नयाँ विकल्प
प्रकाशित मिती: २०७८ असार १७, २०: २४

नयाँ बिकल्प,

काठमाडौं – बैंकिङ कसूर मुद्दाका फरार प्रतिवादी काठमाडौं गोकर्णेश्वर नगरपालिका ७ जोरपाटी बस्ने रामेछाप खाँडाखेती गाउँपालिका ७ स्थायी वतन भएका ४६ वर्षीय सानुकाजी महतलाई बिहिबार प्रहरीले पक्राउ गरेको छ ।

उनी विरुद्धको मुद्दामा उच्च अदालत पाटनको २०७७ पुस १४ र माघ १८ गतेको फैसलाले महतलाई १५ दिन कैद र रु ३५ लाख रुपैयाँ जरिवाना तथा ५ दिन कैद र १३ लाख रुपैयाँ जरिवाना गरी कूल २० दिन कैद र ४८ लाख जरिवाना ठहर गरेको थियो ।

तर, उनी फरार थिए । प्रहरीको केन्द्रीय अनुसन्धान ब्यूरो महाराजगञ्जबाट खटिएको प्रहरीले काठमाडौँ जोरपाटीबाट पक्राउ गरेको जनाइएको छ ।

०७६ मा महतले आफ्नो खातामा पर्याप्त मौज्दात रकम नभएको भन्ने जानी जानी झुक्यानमा पारी नेपाल इन्भेष्टमेन्ट बैंक र एनसिसी बैंकमा रहेको निजको नामको खाताबाट भुक्तान हुने गरी पीडितलाई रु ४८ लाख रुपैँया बराबरको चेक दिएका थिए ।