येँ पूर्ण खोपयुक्त जिल्ला घोषणा

नयाँ विकल्प संवाददाता
प्रकाशित मिती: २०८२ असार ३०, २०: २६

येँ : येँ जिल्लायात पूर्ण खोपयुक्त जिल्ला घोषणा याःगु दु । जिल्ला खोप समन्वय समितिया ग्वसालय् थौं थन ग्वसाःग्वःगु ज्याझ्वलय् बागमती प्रदेशया स्वास्थ्यमन्त्री किरण थापामगरं येँयात पूर्ण खोपयुक्त जिल्ला घोषणा यानादिल ।

वय्कलं दक्व मस्तय्सं पूर्ण खोप कायेधुंकाः जक ल्वचं बचे जुइफइ धासें पूर्ण खोपयुक्त यायेत भूमिका म्हितादीपिं सकलसित सुभाय् बियादिल । प्रदेश सरकारया ध्यान गुणस्तरीय स्वास्थ्य सेवा सुनिश्चित यायेगुपाखे जूगु धासें मन्त्री थापामगरं थुकिइ ग्वाहालि यायेत सकलसित इनाप यानादिल ।

मन्त्रालयया सचिव डा सुमित्रा गौतमं वागमती प्रदेशया फुक्क जिल्ला पूर्ण खोपयुक्त घोषित जूगुलिं याकनं हे प्रदेशयात पूर्ण खोपयुक्त घोषणा याइ धकाः धयादिल । स्वास्थ्य सेवा विभाग परिवार कल्याण महाशाखाया निर्देशक डा विवेककुमार लालं थौंकन्हय् ल्वय्त यक्व दःसां नं खोपं यानाः पाः जूगु धयादिल ।

ज्याझ्वलय् नागार्जुन नगरपालिकाया कार्यवाहक प्रमुख सुशीला अधिकारीं पूर्ण खोपयुक्त जिल्ला घोषणा याना जक मज्यू धासें उकियात दिगो यानातयेमाःगुलिइ बः बियादिल ।

जिल्ला रेडक्रम सोसाइटीया नायः श्याम डोटेलं सुं नं खोप कायेगुपाखें त्वःफिइ मज्यू धकाः धयादिल ।

पूर्ण खोपयुक्त घोषणा यायेत गुगू कथंया खोप बिइगु याइ । बालस्वास्थ्य तथा खोप शाखाया प्रमुख डा अभियान गौतमं उगु खोप बुसांनिसें १५ ला तकया मस्तय्त न्हय्कःखुसी १८ गू मात्रा ब्यूगु जुइमाः धकाः कनादिल । बुसांनिसें क्षयरोगविरुद्धया बिसिजी खोप व १५ ला थ्यन कि दादुरा–रुबेला व टाइफाइड ल्वय्विरुद्धया खोप बिइगु याइ ।

येँय् ६८ द्वः व १०० म्ह मस्तय्त पूर्ण खोप बिइधुंकूगु खँ उगु झ्वलय् जानकारी ब्यूगु खः । ज्याझ्वलय् च्वन्ह्याःम्ह स्वास्थ्यकःमितय्त हंगु खः ।