प्रधानमन्त्रीको अभिव्यक्तिप्रति घोर आपत्ति जनाउँदै जरा अभियानलाई तीव्रता दिने २८ बुँदे कांग्रेसको लुम्बिनी संकल्प

रुपन्देही : नेपाली कांग्रेसले प्रधानमन्त्रीको सीमा सम्बन्धी विवादास्पद अभिव्यक्तिप्रति कडा आपत्ति जनाउँदै २८ बुँदे ‘लुम्बिनी संकल्प’ सार्वजनिक गरेको छ । नेपाली कांग्रेस, केन्द्रीय नीति, अनुसन्धान तथा प्रशिक्षण प्रतिष्ठानद्वारा रुपन्देहीको तिलोत्तमामा आयोजित लुम्बिनी प्रदेशस्तरीय परामर्श कार्यशालाले प्रधानमन्त्रीको भनाइ राष्ट्रिय हित विपरीत रहेको ठहर गरेको हो ।

प्रधानमन्त्रीको अभिव्यक्तिमा घोर भर्त्सना र माफीको माग संसद्को रोस्टममा उभिएर प्रधानमन्त्रीले “हामीले पनि धेरै ठाउँमा सीमाना मिचेका छौँ” भनी दिएको अभिव्यक्ति गैरजिम्मेवार र राष्ट्रिय सार्वभौमिकतामाथि आँच पुर्‍याउने खालको भएको कांग्रेसले जनाएको छ । संकल्प प्रस्तावको पहिलो बुँदामै कांग्रेसले यसको घोर भर्त्सना गर्दै प्रधानमन्त्री, सरकार र सत्ताारुढ दलसँग अविलम्ब सार्वजनिक स्पष्टीकरण र माफीको माग गरेको छ ।

प्रधानमन्त्रीको यस्तो गैरजिम्मेवार भनाइपछि लुम्बिनी प्रदेशको पश्चिम नवलपरासीको सुस्ता क्षेत्रमा नेपाली भूमिमा भइरहेको विकास निर्माणमा अवरोध पुगेको भन्दै कांग्रेसले सरकारको गम्भीर ध्यानाकर्षण गराएको छ ।

संगठन सुदृढीकरणका लागि ‘जरा अभियान’ पार्टी संगठनलाई जगैदेखि बलियो बनाउन कांग्रेसले ‘जरा अभियान’ लाई तीव्रता दिने संकल्प गरेको छ । २८ औँ बुँदामा उल्लेख गरिएको यस अभियानअन्तर्गत पार्टीका क्रियाशील सदस्यहरूको डिजिटल अभिलेख राख्ने र संगठनलाई थप सुदृढ बनाउने लक्ष्य राखिएको छ ।

लुम्बिनी संकल्पका मुख्य बुँदाहरू: जेठ १८ र १९ गते सम्पन्न भेलाले प्रदेश र स्थानीय तहको विकासका लागि २८ बुँदे मार्गचित्र तय गरेको छ । संकल्पका केही महत्वपूर्ण बुँदाहरू यस प्रकार छन् :

कोखदेखि शोकसम्म सामाजिक सुरक्षा: गर्भावस्थादेखि नै सरकारको साथ रहने गरी एकीकृत सामाजिक सुरक्षा कार्यक्रम सञ्चालन गर्ने ।

शून्य बेरुजु र वित्तीय अनुशासन: स्थानीय सरकारहरूलाई ‘शून्य बेरुजु’ बनाउने अभियान सञ्चालन गर्ने र योजना बैंकमार्फत मात्र योजना छनोट गर्ने ।

उद्यमी आमा र घरदैलो सेवा: महिलाहरूको परम्परागत सीपलाई उद्यममा बदल्न ‘उद्यमी आमा’ कार्यक्रम र नागरिकका घरमै स्वास्थ्य सेवा पुर्‍याउन ‘घरदलान सेवा’ प्रभावकारी बनाउने ।

सकुम्बासी समस्याको समाधान: जोखिम क्षेत्रमा रहेका सुकुम्बासीको सम्मानजनक व्यवस्थापन गरी ‘सकुम्बासी समस्यामुक्त स्थानीय तह’ अभियान चलाउने ।

कृषि र पर्यटन: ‘एक स्थानीय तह, एक विशिष्ट कृषि उत्पादन’ नीति लिने र लुम्बिनीलाई केन्द्रमा राखेर ‘बुद्ध सर्किट’ तथा धार्मिक पर्यटनको विकास गर्ने ।

नेपाली कांग्रेसले आफ्ना नेतृत्वमा रहेका स्थानीय सरकारहरूलाई थप सुशासनयुक्त, नागरिकमैत्री र परिणाममुखी बनाउन यो संकल्प जारी गरेको हो । भेलामा लुम्बिनी प्रदेशका सांसदहरू, स्थानीय तहका प्रमुख-उपप्रमुख र पार्टीका विभिन्न तहका पदाधिकारीहरूको सहभागिता रहेको थियो । कांग्रेसले संघीय सरकारलाई संविधानको मर्म र विधिको शासनलाई केन्द्रमा राखेर काम गर्न समेत सचेत गराएको छ ।