भारतीय प्रधानमन्त्री मोदीलाई मातृशोक

एजेन्सी
प्रकाशित मिती: २०७९ पुष १५, १०: १४

नयाँदिल्ली । भारतीय प्रधानमन्त्री नरेन्द्र दामोदर मोदीलाई मातृशोक परेको छ । मोदीकी आमा हिराबेनको १०० वर्षको उमेरमा शुुक्रबार बिहान निधन भएको हो ।

स्वास्थ्य अवस्था बिग्रिएपछि उनलाई अहमदाबादस्थित यूएन मेहता अस्पतालमा भर्ना गरिएको थियो । उपचारकै क्रममा उनको शुक्रबार बिहान स्थानीय समय अनुसार साडे तीन बजे निधन भएको जनाइएको छ ।

आफ्नी आमाको निधनमा प्रधानमन्त्री मोदीले ट्वीट गर्दै भगवानको चरणमा एक गौरवशाली शताब्दीको अन्त्य भएको बताएका छन् ।

‘भगवानको चरणमा एक गौरवशाली शताब्दीको अन्त्य‘ आमामा मैले सधैं त्यो त्रिमूर्ति महसुस गरेको छु, जसमा एक तपस्वीको यात्रा समावेश छ, निस्वार्थ कर्मयोगीको प्रतीक र मूल्य मान्यताप्रति प्रतिबद्ध जीवन’, उनले अगाडि लेखेका छन्, ‘उहाँको सयौं जन्मदिनमा भेट्दा उहाँले एउटा कुरा भन्नुभएको थियो, जुन म सधैं सम्झन्छु– बुद्धिमानीपूर्वक काम गर र पवित्रताका साथ जीवन बिताउने गर ।

यस वर्षको १८ जुनमा प्रधानमन्त्री मोदीले आफ्नी आमाको १०० औं जन्मदिन मनाएका थिए । हीराबेन गान्धीनगर सहर नजिकैको रायसान गाउँमा प्रधानमन्त्री मोदीका भाइ पंकज मोदीसँग बस्दै आएकी थिइन् ।