चियापानले दिने दलिय सहमतिको सन्देश

नयाँ विकल्प
प्रकाशित मिती: २०७६ कार्तिक ७, ०९: ४८

सहमति, सहकार्य, एकता र मेलमिलापको सन्देश दिन आजभन्दा ४३ बर्षदेखि कांग्रेसका संस्थापक नेता विश्वेश्वर प्रसाद कोइरालाले शुरु गरेको बडा दशैंको शुभकामना तथा चियापान कार्यक्रमलाई नेपाली कांग्रेसले यो बर्ष पनि निरन्तरता दियो ।

२०३३ सालमा जननायक बीपी कोइरालाले राष्ट्रिय एकता तथा मेलमिलापको नीति लिई स्वदेश फर्केपछि २०३४ सालदेखि प्रत्येक वर्ष नेपाली कांग्रेसले कोजाग्रत पूर्णिमाको दिनमा चियापान समारोह गरी शुभकामना आदान–प्रदान गर्ने परम्परा शुरु गरेको हो ।

यस्तो परमपराले राजनीतिक दल र दलका नेताबीच रहेको तिक्तता, बैमनस्य र वेमेललाई अन्त्य गरी भाईचार, एकता, सहकार्य र सहयात्राको सन्देश दिने विश्वास गर्न सकिन्छ । बीपीले प्रारम्भ गरेको यस्तो सहमतिय राजनीतिलाई वढवा दिने संस्कारलाई उनको निधनपछि २०४० सालदेखि लौहपुरुष गणेशमान सिंहले आयोजना गर्दै आएका थिए । २०५० सालदेखि भने कांग्रेस सभापति कृष्णप्रसाद भट्टराईले, २०५४ सालदेखि गिरिजाप्रसाद कोइरालाले चियापान कार्यक्रम आयोजना गर्दै आएका थिए ।

कांग्रेसका तत्कालिन नेताहरुले शुरु गरेको यो अभियानलाई अहिले पार्टी सभापति शेरबहादुर देउवाले निरन्तरता दिएर दल र दलका नेताबीचको भाईचारा र मेलमिलापको सन्देश दिने गरेका छन् । विगतका बर्षमा जस्तै यस बर्षको चियापान कार्यक्रमले पनि दलका नेताहरुमा पुनः एकता र मेलमिलापको सन्देश प्रवाह गर्न सकेको छ ।

चियापान कार्यक्रममा कांग्रेसले राजनीतिक क्षेत्रका व्यक्तित्ववाहेक विभिन्न राजनीतिक दलका नेताहरु, नेपाल सरकार मन्त्रीपरिषद्का सदस्यहरु, संबैधानिक निकायका प्रमुखहरु, सांसदहरु, राष्ट्रसेबक कर्मचारी, सुरक्षा निकायका प्रमुख, कुटनीतिक नियोगका प्रमुख, लेखक, साहित्यकार, कलाकार, उद्योगपति एवं व्यवसायीहरु, पेशागत एवं बुद्धिजीवीहरु, नागरिक समाजका अगुवाहरु, मानव अधिकारकर्मी, विभिन्न संञ्चार माध्यमका प्रमुखहरु, पत्रकार, गैर–आवासीय नेपालीहरुको संघ–संस्थाका प्रमुखहरु लगायतका बिशिष्ट महानुभाव, कांग्रेसका सदस्यहरु एवं शुभेच्छुकहरुको सहभागिताले एक आपसमा एकता र मेलमिलाप तथा आत्मियताको सन्देश प्रवाह गरेको छ ।

पार्टी सत्तामा हुँदा तुलनात्मक रुपमा बढी भिँड हुने र सत्तामा नहुँदा भिँड कम हुने प्रचलन विगतदेखिकै हो । यो बर्ष केन्द्रीय कार्यालयमा गरिएको चियापानको व्यवस्थापन विगतको तुलनामा व्यवस्थित थियो । संचारकर्मीहरुलाई समाचार, तस्वीर र भिडियो लिने स्थान र विशिष्ट पाहुनाले शुभकामना सन्देश दिन बेग्लै पोडियमको व्यवस्था गरिनु सकारात्मक पक्ष हो ।