- अनामनगर काठमाडौँ
- infobikalpa21@gmail.com
येँ : संस्कृति, पर्यटन नापं नागरिक उड्डयन मन्त्रालयया सचिव डा विनोदप्रकाश सिंहं नेपाःयात युरोपेली सङ्घ (इयू)या सुरक्षा धलखं याकनं चीकीगु भलसा प्वंकादीगु दु ।
नेपाल एशोसिएशन अफ टूर एण्ड ट्राभल एजेन्ट्स (नाट्टा) या ६० क्वःगु वार्षिकोत्सवया मङ्गलबाः उलेज्या यानादिसें वय्कलं इयूया च्यूताया कथं दूगु नेपाल नागरिक उड्डयन प्राधिकरण (क्यान) ब्वथला विधेयक याकनं संसदपाखें पारित जुइगु व थ्वलिसें नेपाल इयूया सुरक्षा धलखं पिहाँवइगु धयादिल । प्राधिकरण ब्वथलासम्बन्धी विधेयक आः नकतिनि धइथें सङ्घीय संसदय् पेस जूगु दु । थुकियात संसदया निगुलिं सदनं सहलह यानाः पारित यायेमाःगु दु ।
“नेपाःयात इयूया सुरक्षा धलखं पिहाँवयेत न्हापांगु सर्त धइगु हे प्राधिकरणयात ब्वलथाः नियामक व सेवाप्रदायक दयेकेगु खः”, सचिव सिंहं धयादिल, “उगु विधेयक आः संसदय् दर्ता जूगु दु । थुकिइ नं बिस्कंबिस्कं प्रतिक्रिया वयाच्वंगु दु ।”
युरोपेली आयोगं सन् २०१३ निसें नेपाःया हवाई ख्यलय् गम्भीर सुरक्षाया च्यूता क्यनाः हाकूगु धलखय् तःगु खः । सन् २०१३ निसें हे अन्तरराष्ट्रिय नागरिक उड्डयन सङ्गठन (आइकाओ) या गम्भीर सुरक्षा च्यूता (एसएससी) या धलखय् दुथ्याकूगुलिइ सन् २०१७ जुलाईनिसें लिकाःगु खः । नेपालं लिपांगु इलय् हवाई सुरक्षा दर अप्वयेकूगुलिं इयूया हाकूगु धलखं पिहाँवइ धकाः स्वापू दुपिनिसं भलसा काःगु दु ।
सचिव सिंहं मुलुकया आर्थिक विकासया निंतिं दिगो पर्यटन विकास मजिमगाः धकाः न्ह्यथनादिल । “मुलुकया दिगो विकास व रोजगारी सिर्जनाया निंतिं पर्यटन ख्यःया महत्वपूर्ण भूमिका दु, गबलेतक पर्यटनया दिगो विकास जुइमखु उबलेतक मुलुक समृद्ध जुइफइमखु”, वय्कलं धयादिल, “नीतिगत गथः व संरचनागत कमजोरीया हुनिं पर्यटन ख्यलं अपेक्षित गति काये धाःसा फूगु मदु ।” सचिव सिंहं ६० दँया इतिहास दूगु नाट्टां नेपाःया पर्यटनयात अन्तरराष्ट्रिय रुपं प्रवद्र्धन यायेत महत्वपूर्ण भूमिका म्हितू धकाः न्ह्यथनादिल ।
उगु झ्वलय् पूर्वपर्यटन सचिव दीपेन्द्रपुरुष ढकालं नेपाःया पर्यटन विकासया निंतिं नेपाःया हवाई ख्यः इयूया सुरक्षा धलखं पिहाँवइगुया विकल्प मदुगु धयादिल । वय्कलं भैरहवाय् च्वंगु गौतमबुद्ध व पोखराय् च्वंगु पोखरा अन्तरराष्ट्रिय विमानस्थलयात प्रभावकारी कथं न्ह्याकाः हवाई सेवायात चुस्त व प्रभावकारी दयेकेमाःगु जरुरी जूगु न्ह्यथनादिल ।
नाट्टाया अध्यक्ष कुमारमणि थपलियां पर्यटन विकासया निंतिं नीतिगत व संरचनागत सुधार जरुरी जूगु धयादिल । ज्याझ्वलय् नाट्टाया पूर्वकार्यकारी प्रमुख डा हरि शर्मा, नाट्टाया पूर्वअध्यक्ष परिषद्या संयोजक भोलाविक्रम थापालिसेंतय्सं पर्यटन विकासया निंतिं सरकार व निजी ख्यःया साझेदारितायात तब्याकाः यंकेमाःगुलिइ बः बियादिल ।
नाट्टा विसं २०२२ फागुन २७ गते नीस्वंगु खः । नेपाःया पर्यटन प्रवद्र्धन, विकास व नीति निर्माणय् न्ह्यथनेबहगु योगदान बियावयाच्वंगु दु । नाट्टाय् थौंकन्हय् देय्न्यंक झिंछसः स्वयां अप्वः टूर नापं ट्राभल व्यवसायी कम्पनी स्वानाच्वंगु दु ।
नाट्टां नेपालय् पर्यटन व्यवसाययात संस्थागत यासें अन्तरराष्ट्रियस्तरय् नेपाली पर्यटनयात प्रवद्र्धन यायेगु महत्वपूर्ण ज्या यानावयाच्वना धकाः धाःगु दु । ईकथं नीति निर्माण, पर्यटन प्रवद्र्धनात्मक ज्याझ्वः, थीथी अन्तरराष्ट्रिय मेलाय् ब्वति कयाः सरकार व निजी ख्यःया प्रभावकारी समन्वय व सहकार्य यानावयाच्वना धकाः संस्थां धाःगु दु ।
धनकुटा : नेपाली कांग्रेसकी सहमहामन्त्री डा. डिला संग्रौलाले पार्टीको निर्धारित महाधिवेशन आगामी असोजमै सम्पन्न हुने बताउँदै त्यसको तयारीस्वरूप देशभर क्रियाशील...
काठमाडौं : शिक्षा तथा खेलकुदमन्त्री सस्मित पोखरेलले राष्ट्रिय परीक्षा बोर्डले नतिजा समयमै प्रकाशन गर्न कुनै हतार नगरेको स्पष्ट पारेका छन् ।...
चितवन । राष्ट्रिय स्वतन्त्र पार्टी (रास्वपा) ले दोस्रो चरणअन्तर्गत पार्टी पदाधिकारी निर्वाचनको तालिका सार्वजनिक गरेको छ । केन्द्रीय निर्वाचन आयोगका...
