- अनामनगर काठमाडौँ
- infobikalpa21@gmail.com
वीरेन्द्रनगर : सञ्चार नापं सूचना प्रविधिमन्त्री पृथ्वी सुब्बा गुरुङं प्रदेशस्तरीय सञ्चार संस्थातय्गु सुदृढीकरण व मांभाय्या बुखँ प्रवाहं सङ्घीयताया मर्मयात व्यवहारय् हयेत ग्वाहालि जुइ धकाः धयादीगु दु ।
नेपाल टेलिभिजन कर्णाली प्रदेश ब्यूरों थौं सुर्खेतय् ग्वसाःग्वःगु ज्याझ्वःया उलेज्या नापं रेडियो नेपालया कर्णाली प्रदेश प्रसारण केन्द्रपाखें खस भाषं बुखँ प्रशारण यानादिसें मन्त्री गुरुङं खस भाषं न्ह्याकूगु बुखँपाखें कर्णालीया मौलिकता न्ह्यब्वइगु भलसा प्वंकादिल ।
“झीपिं लोकतान्त्रिक प्रणालीइ दु । जनताया सूचना पहुँच सुनिश्चित यायेत सरकार गम्भीर जुयाच्वंगु दु । प्रदेशय् सञ्चारया संस्थागत संरचना निर्माण यायेगु थुकिया हे ब्व खः,” मन्त्री गुरुङं धयादिल, “मांभाषं सञ्चार जुइगु धइगु नागरिक व राज्यदथुइया सम्बन्ध अझ क्वातुइगु खः, थुकिं राष्ट्रिय एकतायात अझ क्वातुकी ।”
कर्णाली प्रदेश न्यनेदइगु जक मखु जनतां ययेकूथें विकास जुइगु भलसा प्वंकादिसें सरकारया प्रवक्ता तकं जुयाच्वनादीम्ह मन्त्री गुरुङं प्रदेश सरकारलिसे सहकार्य यानाः कर्णालीया विकासय् सङ्घ सरकारं प्राथमिकता बियाः न्ह्याःवनीगु प्रतिबद्धता यानादिल । वय्कलं सरकारया सञ्चार माध्यमतय्सं भाषा संस्कृतिया संरक्षण व प्रवद्र्धन यासें राष्ट्रिय एकता धिसिलाकेत सक्रिय जुयाच्वंगु धयादिल ।
रेडियो नेपाल, नेपाल टेलिभिजन, गोरखापत्र व राष्ट्रिय समाचार समिति (रासस) जनतातय्त केन्द्रित जुयाः न्ह्याःवनाच्वंगु वय्कःया धापू खः । मन्त्री गुरुङं थुगु सञ्चारमाध्यमतय्सं देय्या समृद्धि व सुशासनया प्रवद्र्धनय् महत्त्वपूर्ण भूमिका म्हिताच्वंगु धकाः धयादिल । जनताया निंतिं सूचना बिइगु न्हापांगु दायित्व खः धकाः सार्वजनिक सेवा प्रसारण नेपालयात न्ह्याकूगु कनादिसें वय्कलं थुकियात अझ नं प्रभावकारी दयेकीगु प्रतिबद्धता प्वंकादिल ।
एनटिभियात हलिंन्ह्यःने म्हसीकेत थुगुसीनिसें हे अंग्रेजी भाषं प्रशारण यायेगु तयारी यायेधुंकूगु वय्कलं जानकारी बियादिल । कर्णाली प्रदेशं न्ह्याकूगु डिजिटल प्रदेशया योजनायात सङ्घं सहकार्य यानाः ग्वाहालि याइ धकाः मन्त्री गुरुङं न्ह्यथनादिल । खस भाषाया बुखँया सुरुआतं कर्णाली प्रदेशया भाषा, सांस्कृतिक म्हसीका व सञ्चारया पहुँचयात सुदृढ यायेगु ऐतिहासिक कुतः जूगु धयादिल ।
सञ्चारया पहुँचया समावेशीकरण व स्थानीय भाषं बुखँ प्रवाहं लोकतन्त्रयात अझ नं धिसिलाकीगु भलसा प्वंकादिसें मन्त्री गुरुङं आः वइगु इलय् थजाःगु रचनात्मक ज्यायात न्ह्याकाः यंकीगु प्रतिबद्धता प्वंकादिल ।
कर्णाली प्रदेशया मुख्यमन्त्री यामलाल कँडेलं विकास व समृद्धिया खँ जनप्रतिनिधि व कर्मचारीतय् जक मखुसे सकसिगु नं मंकाः विषय खः धकाः थुइकेबीमाःगु आवश्यक जूगु धयादिल । वय्कलं कर्णाली विकट जूगु जक प्रचार जुयाच्वंगु व थनया सम्भावना व विकासया ज्याखँ नं प्रचार यायेमाःगु आवश्यक जूगु धयादिसें थुकिइ सञ्चारमाध्यमतय् भूमिका महत्त्वपूर्ण जुइ धकाः धयादिल । वय््कलं धयादिल, “झीपिं कर्णाली दयेकेत जुयाच्वनागु दु । कर्णालीया विकास व समृद्धिया निंतिं सञ्चारमाध्यमतय् भूमिका महत्त्वपूर्ण जू ।”
अथे हे, सार्वजनिक सेवा प्रशारण नेपालअन्तर्गत रेडियो नेपाल प्रादेशिक प्रशारण सुर्खेतपाखें खस भाषं बुखँ व ज्याझ्वः न्ह्याकूगु दु । न्हिंन्हिंसिया सनिलय् ५ः०५ निसें ५ः१५ तक खस भाषं बुखँ प्रशारण याइ ।
थ्वलिसें रेडियो नेपालं २६ गू भाषं बुखँ प्रशारण जूगु खः । सार्वजनिक सेवा प्रशारण नेपालया कार्यकारी अध्यक्ष डा महेन्द्र विष्टं खस भाषाया संरक्षण व प्रवद्र्धनय् ग्वाहालि यायेगु ताःतयाः खस भाषं बुखँ व ज्याझ्वः प्रशारण न्ह्याकूगु जानकारी बियादिल । वय्कलं नेपाल टेलिभिजनया प्रदेश ब्यूरों कर्णाली प्रदेश केन्द्रित यानाः बुखँ व ज्याझ्वः उत्पादनय् ग्वाहालि जुइगु व थ्व सार्वजनिक सेवा प्रशारण नेपालयात अझ नं प्रभावकारी याइगु तर्क तयादिल ।
धनकुटा : नेपाली कांग्रेसकी सहमहामन्त्री डा. डिला संग्रौलाले पार्टीको निर्धारित महाधिवेशन आगामी असोजमै सम्पन्न हुने बताउँदै त्यसको तयारीस्वरूप देशभर क्रियाशील...
काठमाडौं : शिक्षा तथा खेलकुदमन्त्री सस्मित पोखरेलले राष्ट्रिय परीक्षा बोर्डले नतिजा समयमै प्रकाशन गर्न कुनै हतार नगरेको स्पष्ट पारेका छन् ।...
चितवन । राष्ट्रिय स्वतन्त्र पार्टी (रास्वपा) ले दोस्रो चरणअन्तर्गत पार्टी पदाधिकारी निर्वाचनको तालिका सार्वजनिक गरेको छ । केन्द्रीय निर्वाचन आयोगका...
