साउनको तेस्रो सोमबार : पशुपतिनाथसहित देशभरका शिवालयमा भक्तजनको घुइँचो

नयाँ विकल्प संवाददाता
प्रकाशित मिती: २०८३ श्रावण १८, ११: ५६

काठमाडौं : साउन महिनाको तेस्रो सोमबार आज काठमाडौंको पशुपतिनाथ मन्दिरसहित मुलुकभरका विभिन्न शिवालयहरूमा भक्तजनको घुइँचो लागेको छ ।

विशेषगरी सोमबारको दिन भगवान शिवको पूजा–आराधना र दर्शनका लागि बिहानैदेखि श्रद्धालुहरूको उल्लेख्य उपस्थिति देखिएको हो । पशुपतिनाथ मन्दिरमा आज बिहानैदेखि भक्तजनहरू लामबद्ध भएर दर्शन गरिरहेका छन् ।

साउन महिना र सोमबारको विशेष धार्मिक महत्वका कारण पशुपति क्षेत्रमा श्रद्धालुको बाक्लो चहलपहल रहेको छ । पशुपतिनाथका साथै मुलुकका अन्य प्रमुख शिव मन्दिरहरूमा पनि आज भक्तजनको उल्लेखनीय उपस्थिति रहेको छ ।

देशभरका विभिन्न स्थानमा रहेका शिवालयहरूमा भक्तजनहरूले महादेवको पूजा–आराधना गर्दै जल अर्पण गरिरहेका छन् । साउनको सोमवारका अवसरमा विशेष गरी महिला श्रद्धालुहरू व्रत बस्ने र शिव मन्दिरमा पुगेर सुख, शान्ति तथा समृद्धिको कामना गर्ने परम्परा रहिआएको छ ।

मुलुकभरका शिवालयहरूमा भक्तजनको चापलाई मध्यनजर गर्दै सुरक्षा र दर्शनको व्यवस्थापनलाई सहज बनाइएको छ । पशुपतिनाथ क्षेत्रलगायतका स्थानमा भक्तजनको सहजताका लागि स्वयंसेवक तथा सुरक्षाकर्मीहरू परिचालन गरिएका छन् ।