ठुला होटल, रेस्टुरेन्टले अब काठमाडौं उपत्यकामा ग्यास किन्न नपाउने, घरायसी ग्राहकलाई प्राथमिकता

नयाँ विकल्प संवाददाता
प्रकाशित मिती: २०८३ भाद्र १७, १८: ४९

काठमाडौं : नेपाल आयल निगमले काठमाडौं उपत्यकामा घरायसी उपभोक्तालाई सहज रूपमा एलपी ग्यास उपलब्ध गराउने उद्देश्यले ठुला होटल, रेस्टुरेन्ट तथा अन्य व्यावसायिक प्रयोजनका लागि ग्यास बिक्रीमा तत्कालका लागि रोक लगाएको छ ।

निगमले उपत्यकाभित्र रहेका ग्यास डिपो तथा विक्रेतामार्फत व्यावसायिक प्रयोजनका लागि ग्यास बिक्री नगर्ने निर्णय गरेको हो । अब ठुला होटल, रेस्टुरेन्ट, उद्योग तथा अन्य व्यावसायिक प्रतिष्ठानले आवश्यक ग्यास उपत्यकाबाहिर रहेका ग्यास उद्योगबाट आफैं ढुवानी गरेर ल्याउनुपर्नेछ ।

निगमले सडक अवरोधका कारण ग्यास आपूर्ति प्रभावित भएकाले घरायसी उपभोक्तालाई प्राथमिकतामा राखेर यस्तो व्यवस्था गरिएको बताएको छ ।

निगमका अनुसार व्यावसायिक प्रयोजनका लागि आवश्यक ग्यास उपत्यकाबाहिरका उद्योगबाट सीधै खरिद गरी आफ्नै ढुवानी व्यवस्थामार्फत काठमाडौं ल्याउन सकिनेछ । हेटौंडा, चितवन, नवलपरासीलगायतका जिल्लाबाट काठमाडौं ल्याइएका सिलिन्डरसमेत उपत्यकाका डिपो तथा विक्रेताबाट व्यावसायिक प्रयोजनमा बिक्री गर्न पाइने छैन ।

काठमाडौंमा बिक्री हुने ब्रान्डका सिलिन्डर रिफिलिङ हुने तराई क्षेत्रका उद्योगबाट व्यवसायीले आफैं ग्यास ढुवानी गरेर ल्याउन सक्नेछन्।

पछिल्लो समय राजमार्गमा पहिरो तथा विभिन्न स्थानमा सडक अवरुद्ध भएपछि काठमाडौं उपत्यकामा एलपी ग्यासको आपूर्ति प्रभावित भएको छ । सडक अवरोधका कारण उपत्यकामा ग्यास आपूर्ति गर्ने २२ मध्ये १८ वटा उद्योगमा ग्यास बोकेका बुलेट पुग्न सकेका छैनन् ।

धादिङ, काभ्रे र काठमाडौंमा रहेका ती उद्योगसम्म बुलेट पुग्न नसकेपछि खाली सिलिन्डरहरू ट्रकमार्फत तराईका बोटलिङ प्लान्टमा पठाएर रिफिलिङ गरी पुनः उपत्यकामा ल्याउने तयारी भइरहेको निगमले जनाएको छ ।