उम्मेदवारहरु घरदैलो कार्यक्रममा व्यस्त

नयाँ विकल्प
प्रकाशित मिती: २०७४ मंसिर १२, ०९: ३८

काठमाडौं । उम्मेदवारमाथि भोट माग्न अनिवार्य रुपमा मतदाताको घरदैलोमा पुग्नुपर्ने दबाब परेको छ । यो काठमाडौं उपत्यकाका चर्चित क्षेत्रमध्ये एक हो । ‘लोकतान्त्रिक, वाम गठबन्धन र विवेकशील साझा बीचमा कडा प्रतिस्पर्धा हुने देखिन्छ, तीनै पक्ष जबरजस्त रुपमा प्रस्तुत भइरहेका छन् ।’

१ नं. क्षेत्रका कांग्रेसबाट प्रकाशमान सिंह, वाम गठबन्धनबाट माओवादी केन्द्रका अनिल शर्मा र विवेकशील साझाबाट रवीन्द्र मिश्र मैदानमा छन् । कांग्रेसका पूर्वमहामन्त्री सिंहलाई चुनौती दिने गरी वाम गठबन्धन र विवेकशील साझाका उम्मेदवार मैदानमा उत्रिएपछि सिंहमाथि घरदैलो गर्नुपर्ने दबाब परेको हो ।
काठमाडौं १ विशुद्ध सहरी क्षेत्रमात्र रहेको निर्वाचन क्षेत्र हो । सो क्षेत्रवाट उम्मेदवारी दिने कांग्रेसका प्रकाशमान सिंह, वाम गठबन्धनका अनिल शर्मा र विवेकशील साझा पार्टीका रवीन्द्र मिश्र घरदैलोमा व्यस्त छन् । ०६४ र ०७० सालको निर्वाचनमा घरदैलो नगरेका कांग्रेस उम्मेदवार सिंह यसपटक भने मतदाताको घरघर पुगिरहेका छन् ।

कात्र्तिक २० गतेदेखि नियमित घरदैलोमा व्यस्त छु, सकेसम्म सबै मतदाताको सिंहले घरमा पुग्ने जानकारी दिए । बिहान–साँझ घरदैलो तथा दिउँसो पार्टीको आन्तरिक बैठक र अन्तरक्रियाको कार्यतालिका बनाएर खटेका छन् ।
दुईदुई पटक सभासद् हुँदा उक्त क्षेत्रमा गरिएका विकास निर्माण कार्य र योजनाको सूची राखेर २० पृष्ठको फेहरिस्तसहित सिंह चुनावी मैदानमा छन् । सिंह भन्छन्, ‘मेरो प्रतिस्पर्धा वाम गठबन्धनसँगै हुन्छ, अरुसँग हुन्न ।’ कम्तीमा १५ हजार मत ल्याएमा चुनाव जित्ने लक्ष्य राखेका छन् ।
वाम गठबन्धनका उम्मेदवार माओवादी केन्द्रका अनिल शर्मा पनि घरदैलोमा व्यस्त छन् । घरदैलो कार्यक्रममा कांग्रेसको तुलनामा कमजोर देखिएता पनि चुनाव जित्नेमा उनी ढुक्क छन् । ‘वामगठबन्धनका पक्षमा जनलहर छ, त्यसैले मलाई जिताउँछ।
स्थानीय तहको निर्वाचनमा पाएको मत विश्लेषण गर्दा वामपन्थी कांग्रेसभन्दा बलियो देखिएको छ । त्यसले पनि वाम उम्मेदवार शर्मा बढी नै उत्साहित भएका हुन् । स्थानीय निर्वाचनमा सो क्षेत्रवाट २३ हजार ८ सय ३ मत खसेको थियो । उक्त क्षेत्रमा खसेको वडा अध्यक्षहरुको मत विश्लेषण गर्दा एमालेको ८,७१४ र माओवादी केन्द्रको २२७४ गरी वाम गठबन्धनका पक्षमा ११,०१५ मत खसेको देखिन्छ भने भने लोकतान्त्रिक गठबन्धन आबद्ध कांग्रेसको ८,८४२ र राप्रपा १,५५०को गरी जम्मा १०,३९२ मत खसेको देखिन्छ । स्थानीय तहमा वाम गठबन्धन ६२३ मतले अगाडि छ ।