- अनामनगर काठमाडौँ
- infobikalpa21@gmail.com
मन्त्री यती बेहोसी भए कि – दोहोरो सुविधा लिएको थाहा पाएनन्
काठमाडौं । सुशासन र सदाचारको नारा दिनहुँ दिएर नथाक्ने वर्तमान मन्त्रीपरिषद्का प्रधानमन्त्री केपी शर्मा ओली र उनकै मन्त्रीपरिषद्का सदस्यहरु राज्यबाट दोहोरो सुविधा दोहन गरिरहेका छन् ।
मन्त्रीहरुको यस्तो हर्कत र व्यवहारबाट उनकै आसेपासे र अन्धभक्तहरु त खुसी होलान तर आफ्नो गाँस काटेर राज्यलाई राजश्व बुझाइरहेका स्वभिमानी नेपाली नागरिकहरुले भने धिक्कारी रहेका छन् । राज्य संचालन गर्ने र देशलाई समृद्धि बनाई नेपाली जनतालाई खुसी तुल्याउने ओली नेतृत्वको सरकारको नारा नारामै सिमित भएको छ । मुलुकमा देखिएका यावत समस्यालाई समाधान गर्ने क्षमता बोकेको र योग्य भएको दाबी गर्ने मन्त्रीहरु यति वेहोसी र हुस्सु भएको दाबी गर्छन कि मेरो खातामा कहाँबाट पैशा आइरहेको छ मलाई थाहै छैन् ।
उप्रधानमन्त्री इश्वर पोखरेल, भौतिक पूर्वाधार तथा यातायात व्यवस्था मन्त्री रघुवीर महासेठ, उद्योग, वाणिज्य तथा आपूर्ती मन्त्री मातृका यादब, बन तथा वातावरण मन्त्री शक्ति बस्नेत, बैदेशिक रोजगार मन्त्री गोकर्ण विष्ट र संचार तथा सूचना प्रविधि मन्त्री गोकुल बास्कोटाले समेत विज्ञप्ती जारी गरेर आफूहरुले दोहोरो सुविधा लिएको थाहा नभएको जनाउँदै आएका छन् । उनीहरुले मन्त्रालय र सचिवालयले सुविधा बुझ्ने हुँदा आफूहरुलाई थाहा नभएको दाबी गरेका छन् ।
राज्यले उपलब्ध गराएको इन्धनबापतको रकम ग्रहण गरेर मन्त्रालयले उपलब्ध गराएको इन्धन हाल्न बानी परेका मन्त्रीको हर्कत हेर्दा सत्तारुढ दल नेकपाका नेता मात्र होइन, कार्यकर्ता नै छक्क परेका छन् । ओली नेतृत्वको मन्त्रीपरिषद्का २४ मध्ये २३ मन्त्रीले यस्तो दोहोरो सुविधा लिएको पाईएको हो । अर्थमन्त्री डा. युवराज खतिवडाले मात्र दोहोरो सुविधा लिएको पाइँदैन ।
दोहोरो सुविधा लिने २४ मन्त्रीले स्वकीय सचिवलाई पनि गैरकानुनी रूपमा गाडी र इन्धन दिलाएको भेटिएको छ । प्रधानमन्त्री केपी ओलीले भ्रष्टाचारमा ‘शून्य सहनशीलता’को नारा दिनहुँ घन्काइरहँदा साईकल चढेर पर्यावरण जोगाउने राज्यको सुविधा अनावश्यक खर्च गर्दिन र नगरेको भन्दै पुस्तक नै प्रकाशित गरेका साईकल मन्त्रीको उपमाले चिनिएका लालबाबु पण्डितले समेत दोहोरो सुविधा लिएको पाइएको छ ।
मन्त्रिपरिषद्का सदस्यहरूको पारिश्रमिक सेवा–सुविधासम्बन्धी ऐनअनुसार इन्धन खर्च लिइरहेका उनीहरूले मन्त्रालय वा मातहतका कार्यालयबाट तेल हालिरहेका छन् । उनीहरुको यस्तो कार्यलाई भ्रष्टाचार गरेकै क्रियाकलाप अन्तरगत मानिन्छ । तर दुई तिहाई बहुमत प्राप्त सरकारको मन्त्री भएको दम्भ देखाउँदै मन्त्रीहरुले आफूहरुले त्यस्तो सुविधा लिएको थाहै नपाएको भनेर टार्ने र आफ्नो द्रब्य मोहलाई ढाकछोप गरेका छन् ।
धेरैजसो मन्त्रीले मन्त्रालयमा सचिवस्तरीय निर्णय गराएर एक सय ५० देखि तीन सय लिटरसम्म इन्धन लिने गरेका छन् । मन्त्रीका स्वकीय सचिवहरूले पनि गैरकानुनी रूपमा मन्त्रालयबाट गाडी, इन्धनलगायतका सुविधा र स्वकीय सचिवालयका अन्य सदस्यहरूले मोटरसाइकल र इन्धन लिएका छन् ।
मन्त्रिपरिषद्का सदस्यहरूको पारिश्रमिक सेवा सुविधा सम्बन्धी ऐनअनुसार प्रधानमन्त्री, मन्त्री, राज्यमन्त्री र सहायकमन्त्रीको तलबलगायत विभिन्न शीर्षकमा सुविधा लिइरहेका हुन्छन । भत्ता, इन्धन खर्च, मन्त्रीको स्वकीय सचिलायका सदस्यहरूको तलव भत्तालगायतका सबै सुविधा भुक्तानी गरिरहेको प्रधानमन्त्री तथा मन्त्रिपरिषदको कार्यालयको रेकर्डमा देखिन्छ ।
अर्थमन्त्री डा. युवराज खतिवडाबाहेक सबै मन्त्री र राज्यमन्त्रीले नियमित रुपमा इन्धन वापत एकमुष्ट पैसा लिएका छन् । उपप्रधानमन्त्रीले इन्धनका लागि मासिक २४ हजार ५ सय १४ रुपैँया, मन्त्रीहरूले मासिक २१ हजार ३ सय २१ रुपैँया र राज्यमन्त्रीले मासिक १८ हजार ५४० रुपैँया लिइरहेका छन् ।
हाल मन्त्रीहरुले तलव बापत ६० हजार ९ सय ७० रुपैयाँ, महंगी भत्ता ८ हजार, संचार भत्ता ३ हजार, मसलन्द खर्च तीन हजार ५ सय र इन्धनका लागि २१ हजार ३ सय २१ रुपैयाँ बुझ्दै आएका छन् । वन तथा वातावरणमन्त्री शक्ति बस्नेतले गृह मन्त्रालयले गाडी प्रयोग गरिरहेका छन् उनले इन्धनका लागि मन्त्रिपरिषद् कार्यालयबाट मासिक २१ हजार बुझिरहेका छन् ।
उनले मन्त्रालयबाट एउटा ल्यान्डक्रुजर गाडी र बा.२ झ २२०१ नम्बरको अतिरिक्त गाडी पनि लिएका छन् । उनका स्वकीय सचिवले पनि मन्त्रालयबाट गाडी र इन्धन लिएका छन । भूमि व्यवस्था, सहकारी तथा गरिबी निवारणमन्त्री पद्माकुमारी अर्यालले ८ जनाको स्वकीय सचिवालय बनाएकी छिन् । मन्त्री र सचिवालय सदस्यको सबै सेवा–सुविधा मन्त्रिपरिषद्ले भुक्तानी गर्दै आएको छ । गृह मन्त्रालयले गाडी सुविधा लिएर पनि उनले इन्धनलगायत सुविधा मन्त्रालयबाटै लिइरहेकी छिन । जवकी उनले मन्त्रीपरिषद्बाट पनि इन्धन बापतको रकम बुझिरहेकी छन् ।
कानुन, न्याय तथा संसदीय मामिलामन्त्री भानुभक्त ढकालले पनि मन्त्रिपरिषद् कार्यालयबाट सुविधा खर्च एकमुष्ट रकम लिँदै आएका छन् । गाडीमा इन्धन मन्त्रालयबाटै भर्छन् । तर उनले मन्त्रालयबाट मासिक १६८ लिटर इन्धन हाल्ने गरेका छन् । उनले पनि गृह मन्त्रालयले उपलब्ध गराएको गाडी प्रयोग गरिरहेका छन् । मन्त्री ढकालले थप एउटा प्राडो र अर्को कार मन्त्रालयबाट लिँदै आएका छन् ।
प्राडो मन्त्रीले नियमित प्रयोग गरे पनि सानो कार भने झन्डा नराखी पारिवारिक काममा प्रयोग गर्ने गरिएको छ । उनको स्वकीय सचिवले पनि मन्त्रालयबाट स्कारपिओ गाडी र इन्धन सुविधा लिँदै आएका छन् ।
खानेपानीमन्त्री विना मगरले विजयदेव भट्टराईलाई स्वकीय अधिकृत र रमेशदत्त भट्टलाई प्रशासन सहायकमा नियुक्त गरेकी छिन । ५ जनाको सचिवालयको तलब सुविधा र आफ्नो तलबभत्तासहित उनले मन्त्रिपरिषद् कार्यालयबाट मासिक १ लाख ९५ हजार ७ सय ९३ रुपैयाँ बुझ्दै आएकी छिन् । उक्त पैसाभित्र उनको इन्धन सुविधाबापतको पैसा पनि जोडिएको छ । उनको सुविधाका लागि गृह मन्त्रालयले गाडी उपलब्ध गराएको थियो ।
तर, उनले मेलम्ची आयोजनाको टोयोटाको विलासी गाडी ल्यान्डक्रुजर प्राडो प्रयोग गर्दै आएकी छिन । सो गाडीका लागि मासिक एक सय ५० देखि २ सय लिटरसम्म इन्धन पनि मन्त्रालयबाटै लिइरहेकी छिन ।
संघीय समाजवादी फोरमका नेता तथा सहरी विकासमन्त्री मोहम्मद इस्तियाक राईले ७ जना स्वकीय सचिवालय नियुक्त गरेका छन । उनले पनि मन्त्रिपरिषद् कार्यालयबाट मासिक एकमुष्ट रकम बुझ्दै मन्त्रालयबाट पनि इन्धन लिइरहेका छन् । उनले गृह मन्त्रालयको गाडि लिएका छन भने तर फोर्ड कम्पनीको करिब एक करोड पर्ने गाडी चढ्ने गरेका छन् ।
उनका स्वकीय सचिव सम्सुल हक राईले भवन विभागबाट बा.२झ ३६३८ नम्बरको स्कारपिओ गाडी प्रयोग गरिरहेका छन् । महिला, बालबालिका तथा ज्येष्ठ नागरिकमन्त्री थममाया थापाले प्रधानमन्त्री तथा मन्त्रिपरिषद्बाट तलब तथा अन्य सुविधासहित मासिक इन्धन सुविधा पनि लिइरहेकी छिन । मन्त्रिपरिषद् कार्यालयले मासिक तलब तथा अन्य सुविधा भुक्तानी गरेको बिलमा उनले इन्धन शीर्षकमा मासिक २१ हजार ३ सय लिएको देखिन्छ ।
तर, मन्त्रालयबाट मासिक एक सय ५० लिटर लिइरहेकी छन् । नियमअनुसार दिन नमिल्ने भए पनि जबर्जस्त दिएको उनले बताए । थापाका अनुसार मन्त्री र उनको स्वकीय सचिवले गाडी र इन्धन मन्त्रालयबाट लिइरहेका छन् । रक्षामन्त्री ईश्वर पोखरेलले नेपाली सेनाबाट प्राप्त करिब २ करोड पर्ने टोयोटाको ल्यान्डक्रुजर, मन्त्रालयबाट प्राप्त करिब ५० लाखको स्कारपिओ र गृह मन्त्रालयले दिएको एउटा कार प्रयोग गर्दै आएका छन् ।
रक्षासचिवले स्कारपिओ कम्पनीको गाडी चढ्छन् ।
गृहमन्त्री रामबहादुर थापा बादल एक करोड ५५ लाख पर्ने मित्सुबिसी पजेरो गाडी चढ्छन् । स्वास्थ्यमन्त्री उपेन्द्र यादव टोयोटा कम्पनीको करिब २ करोड रुपैयाँबराबरको ल्यान्डक्रुजर गाडी चढ्छन । कानुनमन्त्री भानुभक्त ढकाल टोयोटाको ल्यान्डक्रुजर प्राडो चढ्छन् ।
कानुन सचिवले भने स्कारपिओ र हुन्डाईको आइ–२० आस्टा मोडलको दुईवटा गाडी चढ्दै आएका छन् । अर्थमन्त्री युवराज खतिवडा र सचिव राजन खनालले निसान कम्पनीको ‘निसान एक्स–ट्रायल’ मोडलका गाडी चढ्दै आएका छन । ती गाडीको नेपाली बजारको मूल्य करिब एक करोड जति पर्न आउँछ ।
काठमाडौं : नेपाली कांग्रेसको १५औँ महाधिवेशनबाट गगनकुमार थापाको नेतृत्वमा निर्वाचित नयाँ केन्द्रीय कार्यसमितिमा चिकित्सक, इन्जिनियर तथा विभिन्न विषयका विज्ञहरूको उल्लेख्य...
काठमाडौँ— नेपाल विद्युत् प्राधिकरणले बडादशैंका अवसरमा उपभोक्तालाई भरपर्दो, नियमित र गुणस्तरीय विद्युत् आपूर्ति सुनिश्चित गर्न देशभरका वितरण केन्द्रलाई आवश्यक तयारी...
काठमाडौं : सरकारले बुढीगण्डकी बाढीमा आएको बाढीबाट प्रभावित गोरखा जिल्लाको चुम नुब्री गाउँपालिका, धार्चे गाउँपालिका र आरुघाट गाउँपालिका तथा धादिङ...
