मृत्यु भएका मतदाताको नाम हटाइएन

नयाँ विकल्प संवाददाता
प्रकाशित मिती: २०७९ बैशाख २५, ०८: ४१

दाङ । मृत्यु भएका मतदाता कसैको पनि नाम नहटाएको पाइएको छ । विसं २०७४ यता कति मतदाताको मृत्यु भएको ? स्थानीय तहहरूले नामावली नपठाइएपछि उनीहरूको नाम नहटाएको बताइएको छ ।

जिल्लामा भएका मतदातामध्ये केही मृत्यु भएका पनि समावेश हुन सक्ने लुम्बिनी प्रदेश निर्वाचन कार्यालय दाङका सूचना अधिकारी गेहेन्द्र कुँवरले बताए ।उनले भने, ‘स्थानीय तहहरूले मृत्यु भएकाहरूको नाम पठाएनन्, त्यसैले मृत्यु भएकाको नाम पनि समावेश छ ।’

दाङमा दोहोरो नाम भएका मतदाताको मात्रै नामावलीबाट हटाइएको र बाँकी अन्य कुनै मतदाताको नाम नहटाइएको उनले बताए । स्थानीय तहहरुले विसं २०७४ यता १८ वर्षमाथिका कति जनाको मृत्यु भयो तथ्याङ्क तयार पारेर निर्वाचन आयोगलाई नपठाएको उनको भनाइ छ ।

निर्वाचन आयोगमा दाबी–विरोध परेकाको तथ्याङ्क मात्रै पठाएको तर मृत्यु भएकाको नाम नपठाएको बबई गाउँपालिकाका प्रमुख प्रशासकीय अधिकृत भीष्मकुमार मल्लले बताए । मृत्यु भएकाको नामावली कटाउने प्रणाली भए सजिलो हुने उनको भनाइ छ ।

जिल्लामा कूल ४ लाख नौ हजार ९०० मतदाता रहेका छन् । विसं २०७४ मा भएको निर्वाचनमा जिल्लामा तीन लाख ७७ हजार पाँच मतदाता रहेका थिए ।