देउवाको बयान- घरमा भेटिएको रकमबारेका भिडियो एआईबाट बनेका

नयाँ विकल्प संवाददाता
प्रकाशित मिती: २०८२ चैत्र ११, १६: ५३

काठमाडौं : पूर्वप्रधानमन्त्री शेरबहादुर देउवाले जेनजी आन्दोलनका क्रममा आफ्नो निवासमा भेटिएको भनिएको रकमसम्बन्धी सामाजिक सञ्जालमा फैलिएका भिडियोहरू ‘एआईबाट बनाइएको’ हुनसक्ने बताएका छन् ।

जेनजी आन्दोलनमा भएको दमनबारे जाँचबुझ गर्न गठित आयोगलाई बयान दिँदै देउवाले उक्त सामग्रीप्रति आपत्ति जनाउँदै आफूमाथि नितान्त षड्यन्त्र गरिएको दाबी गरेका हुन् ।

जनआस्था साप्ताहिकको सौजन्यमा प्राप्त प्रतिवेदनमा देउवाले २०८२ भदौ २३ गते आफू बूढानीलकण्ठ–२, बासुकी मार्गस्थित आफ्नै निवासमा रहेको बताएका छन् । सोही साँझ बालुवाटार पुगेर सामाजिक सञ्जालमाथिको प्रतिबन्ध हटाउन आग्रह गरेको र तत्कालीन प्रधानमन्त्रीले सो प्रतिबन्ध हटाएको उनले बताएका छन् । यद्यपि, उक्त दिन आफू कुनै औपचारिक बैठकमा सहभागी नभएको उनको भनाइ छ ।

भदौ २४ गते बिहान करिब १० बजे प्रदर्शनकारीहरू आफ्नै निवासमा भेला भई नाराबाजी गर्दा सुरक्षाकर्मीले रोक्ने प्रयास गरेको, त्यसक्रममा झडप भएको र केही जेनजी समूहका युवाहरूले आफूलाई जोगाएको देउवाले उल्लेख गरेका छन् । त्यसपछि राति करिब १० बजेतिर आफूहरू सुरक्षित स्थानमा पुगेको उनले बताएका छन् ।

निवासमा भेटिएको भनिएको रकमबारे नेपाल प्रहरीले वडा अध्यक्षको रोहबरमा मुचुल्का तयार पारेको भए पनि ठुलो परिमाणको रकम नभएको देउवाको दाबी छ । सामाजिक सञ्जालमा देखाइएका विवरणहरू भ्रामक रहेको र ‘एआईमार्फत तयार गरिएको’ हुनसक्ने उनको भनाइ छ । उक्त विषयमा आफूले कुनै प्रहरी कार्यालयमा उजुरी नगरेको समेत उनले बताएका छन् ।

देउवाले आफ्नो निवासमा भएको तोडफोड, आगजनी र लुटपाटबारे प्रहरी अनुसन्धान भइरहेको उल्लेख गर्दै कारबाहीबारे आफूलाई जानकारी नभएको बताएका छन् । साथै, २३–२४ भदौका घटनामा राजनीतिक हस्तक्षेप गरेको आरोप अस्वीकार गर्दै उनले प्रहरीको मूल्यांकनमा हस्तक्षेप नभएको जिकिर गरेका छन् ।

उनले लोकतन्त्रमा ट्रेड युनियन अधिकारलाई सम्मान गर्नुपर्ने, विद्यार्थी संगठनहरू पनि बृहत्तर हितमा सक्रिय हुनुपर्ने र गैर–राजनीतिक संस्थामा राजनीतिकीकरण हुन नहुने धारणा व्यक्त गरेका छन् । हिंसात्मक गतिविधिमा संलग्न जो–कोहीलाई कारबाही गर्नुपर्ने र युवाहरूको भावना समेट्दै नीतिगत तथा संस्थागत सुधार आवश्यक रहेको उनको भनाइ छ ।