बेपत्ता हेमराज भेट्टाउनेलाई १० लाख पुरस्कार

नयाँ विकल्प संवाददाता
प्रकाशित मिती: २०७९ कार्तिक १७, ०७: ३५

काठमाडौं । विगत २४ दिनदेखि बेपत्ता म्याग्दीको बेनी नगरपालिका–५ पुलाचौर स्थायी घर भई हाल काठमाडौँ महानगरपालिका–१६ बनस्थली बस्ने ५० वर्षीय हेमराज शर्माको खोजिकार्य जारी छ ।

असोज २६ गते आइतबार साँझ ४ बजेदेखि बेपत्ता भएका शर्माको खोजीकार्यमा अहिलेसम्म कुनै पनि प्रगति नभएको शर्माका आफन्त विवेक शर्माले बताए ।

सामाजिक एवं राजनीतिक गतिविधिमा सक्रिय शर्मा एक्कासि सम्पर्कविहीन भएपछि परिवारका सदस्यले खोजीका लागि अपिल गरे पनि हालसम्म फेला नपरेपछि सूचना दिनेलाई नगद रु १० लाखसमेत पुरस्कार दिने परिवारले घोषणा गरेको छ ।

घर परिवारमा कुनै झैझगडा मनमुटाव नभए पनि केही आत्तिएको जस्तो भने देखेको परिवारका सदस्यको भनाइ छ । आफन्त, शुभचिन्तक र प्रहरीले काठमाडौँ आसपासका क्षेत्रमा नियमित जाने स्थान

तथा वनजङ्गल, खोलानाला र विभिन्न स्थानमा समेत व्यापक खोजी गरिसकेको छ । अहिलेसम्म कुनै सुराक फेला नपरेपछि परिवार चिन्तित भएका छन् ।