जापानको शक्तिशाली भूकम्पमा मृत्यु हुनेको संख्या ३४ पुग्यो, उद्धार कार्य जारी

नयाँ विकल्प
प्रकाशित मिती: २०८३ श्रावण १५, १९: २७

काठमाडौं । जापानको दक्षिणपश्चिम क्षेत्रमा आएको शक्तिशाली भूकम्पमा मृत्यु हुनेको संख्या ३४ पुगेको छ। कुमामोटो प्रान्तीय सरकारले शुक्रबार सार्वजनिक गरेको विवरणअनुसार भूकम्पका कारण ठूलो जनधनको क्षति भएको छ।

मंगलबार जापानको दक्षिणी मुख्य टापु क्युसुमा ७.१ म्याग्निच्युडको भूकम्प गएको थियो। अधिकारीहरूका अनुसार हालसम्म ३४ जनाको मृत्यु पुष्टि भएको छ भने थप एक जनाको मृत्युबारे अनुसन्धान भइरहेको छ।

भूकम्पमा ८० भन्दा बढी व्यक्ति घाइते भएका छन्। तीमध्ये पाँच जनाको अवस्था गम्भीर रहेको जनाइएको छ। तीन हजार पाँच सयभन्दा बढी घर अझै विद्युत् सेवाविहीन छन् भने नौ हजारभन्दा बढी मानिस अस्थायी आश्रयस्थलमा बसिरहेका छन्। प्रभावित क्षेत्रमा विद्युत् आपूर्ति पुनःस्थापना र आश्रयस्थलमा आवश्यक सेवा उपलब्ध गराउने काम भइरहेको छ। अत्यधिक गर्मीका कारण स्वास्थ्य जोखिम बढ्न सक्ने भन्दै अधिकारीहरूले सतर्कता अपनाउन आग्रह गरेका छन्।

सबैभन्दा बढी क्षति कुमामोटोको काशिमा नगरस्थित एक व्यापारिक केन्द्रमा पुगेको छ। भूकम्पपछि भएको विस्फोट र भवनको दोस्रो तला भत्किँदा केही व्यक्ति पुरिएका थिए। उद्धार टोलीले शुक्रबार पनि खोज तथा उद्धार अभियानलाई तीव्रता दिएको छ।

सञ्चालक कम्पनीका अनुसार विस्फोट हुनुअघि करिब तीन हजार ग्राहकलाई सुरक्षित रूपमा बाहिर निकालिएको थियो। जापान सरकारका मुख्य मन्त्रिपरिषद् सचिव मिनोरु किहाराले घटनास्थलबाट सात जनाको मृत्यु पुष्टि भएको तथा ११ जनाको सकुशल उद्धार गरिएको जानकारी दिएका छन्। यद्यपि, अझै कति व्यक्ति बेपत्ता छन् भन्ने विवरण सार्वजनिक गरिएको छैन।

यसैबीच, यात्सुशिरोस्थित कागज उद्योगको एक कारखानामा भूकम्पका कारण चिम्नी ढलेपछि सञ्चालन गरिएको उद्धार अभियान सम्पन्न भएको छ। उक्त घटनामा ११ जनाको सकुशल उद्धार गरिएको छ भने नौ जनाको मृत्यु भएको अधिकारीहरूले बताएका छन्।

अधिकारीहरूले प्रभावित क्षेत्रमा उद्धार, राहत र पुनःस्थापनाको कामलाई तीव्र बनाइएको जनाउँदै नागरिकलाई सतर्क रहन आग्रह गरेका छन्।