- अनामनगर काठमाडौँ
- infobikalpa21@gmail.com
काठमाडौं : नेपाली कांग्रेसले प्रधानमन्त्रीको संसदमा उपस्थितिलाई लिएर जारी बहस अब निर्णायक मोडमा पुगेको बताउँदै त्यस विषयलाई अनावश्यक रूपमा लम्ब्याउन नहुने धारणा व्यक्त गरेको छ ।
प्रतिनिधि सभाको बुधबारको बैठकमा बोल्दै कांग्रेस संसदीय दलका नेता भीष्मराज आङ्देम्बेले प्रधानमन्त्रीको उपस्थिति वा अनुपस्थितिले अब संसद्को कार्यसूची प्रभावित हुन नहुने टिप्पणी गरे । उनका अनुसार वर्तमान विवादलाई थप तन्काएर राष्ट्रिय हितमा असर पर्ने अवस्था सिर्जना गर्नु उपयुक्त हुँदैन ।
उनले प्रधानमन्त्रीको हालैको अभिव्यक्तिप्रति आपत्ति जनाउँदै त्यसलाई राजनीतिक र संवैधानिक दृष्टिले गम्भीर रूपमा लिनुपर्ने बताए । साथै, संसद् अवरोधका कारण अनावश्यक रूपमा समय र संसदीय ऊर्जा खेर गइरहेको पनि उनले उल्लेख गरे ।
आङ्देम्बेका अनुसार पार्टीभित्रै पनि प्रधानमन्त्रीमाथि कडा राजनीतिक दबाब सिर्जना गर्ने विषयमा बहस भएको थियो । तर, राष्ट्रहितलाई प्राथमिकतामा राख्दै विवादलाई अत्यधिक विस्तार नगर्ने निष्कर्षमा पुगेको उनले बताए ।
उनले सीमा सम्बन्धी विषय लामो समयसम्म अनिर्णीत रहँदा राष्ट्रिय संवेदनशीलता प्रभावित हुन सक्ने भन्दै प्रधानमन्त्रीले संसदमा उपस्थित भई स्पष्ट धारणा दिनुपर्ने आवश्यकता अझै कायम रहेको धारणा व्यक्त ग रे।
आङ्देम्बेले प्रधानमन्त्रीको भनाइ इतिहासमा दर्ज हुने भएकाले त्यसलाई हल्का रूपमा नलिनुपर्ने पनि उल्लेख गरेका छन् ।
सम्बोधनको मुख्य अंशसहित
सम्माननीय सभामुख महोदय,
आज असामान्य परिस्थितिमा म यो सम्मानित सदनलाई सम्बोधन गर्न उभिएको छु । म जान्दछु- म त्यो देशको नागरिक हुँ, जुन देश इतिहासमा कहिल्यै कसैको उपनिवेश बनेन । म जान्दछु- मेरो देश वीर गोर्खालीको देश, दुनियाँमा कहिल्यै कसैका सामु झुकेन । तपाईं हामी कयौंले बाल्यकालदेखि गोपाल योन्जनको गित सुन्दै आयौं – खोसेको रोटीले मेरो पेट भरिन्न, मागेको धोतिले मेरो लाज छोपिन्न, घोटिएर हात-पाउ झरिजाउन् औंला, तर कोई अगाडि यी हात जोडिन्न। बनेको छ पहराले यो छाती मेरो सभामुख महोदय, यो राष्ट्रिय गितको शब्द / शब्दले यहि सन्देश दिएको छ कि नेपाली आमाको गर्भबाट हिजो जन्मिएका या भविस्यमा जन्मने प्रत्येक बच्चा, प्रत्येक मान्छे- शिरमा स्वाभिमान बोकेर बाँच्नेछ । सगरमाथा मात्रै होईन, सगरमाथा जत्रै स्वाभिमान बोकेर बाँच्नेछ । तर यसो सोच्छु सभामुख महोदय, आज गोपाल योन्जन हुनुन्थ्यो भने – `हाम्रो देशले छिमेकीको सिमाना मिचेको छ´ भन्ने प्रधानमन्त्रीको अभिव्यक्ति सुनेर के भन्नुहुन्थ्यो होला ? उहाँले पक्कै शोध्नुहुने थियो- उनले पनि मिचे, हाम्ले पनि मिच्यौँ के हिसाब बराबर भन्न खोज्नुभएको हो प्रधानमन्त्रीजी ? दुनियाँलाई थाहा छ ।
सभामुख महोदय, * लिपुलेक हाम्रो हो, * कालापानी हाम्रो हो, * लिम्पियाधुरा हाम्रो हो । यहि संसदले ती भुभाग सहितको नेपालको नक्सा पारित गरेको पनि दुनियाँलाई थाहा छ । यो बिषयको हल उत्तेजना र आवेगले होईन संयमित ढंगले गहन संवादको माध्यमबाट कुटनैतिक प्रक्रियाबाट हुनुपर्छ । हामी सबै यहि चाहन्छौं । त्यसका लागि हामी पक्ष – प्रतिपक्ष सबै नै सरकारको साथमा थियौं र छौं । तर सरकार र सत्तारुढ पार्टीको रवैया यो गम्भीर प्रश्नप्रति गम्भीर देखिन्न ।
सभामुख महोदय ,
*सरकार अलग कुरा हो, पार्टी अलग । * मन्त्री / प्रधानमन्त्री पद अलग हो , सांसद अलग । यो तथ्य बुझेर अघिल्लो संसदमा जुन बेला मेरो पार्टी नेपाली काँग्रेस सरकारमा थियो, त्यसबेला काँग्रेसकै दुई महामन्त्री रोस्ट्रममा उभिएर आफ्नै सरकारको पनि कमजोरी केलाउनु हुन्थ्यो । काँग्रेसकै सांसदहरू काँग्रेसकै मन्त्री / प्रधानमन्त्रीका विरुद्ध आवश्यक बिषयमा प्रश्न उठाउनु हुन्थ्यो । प्रहार गर्नुहुन्थ्यो । त्यसैले दम राखेर भन्न सकियो – काँग्रेस लास र दासहरुको पार्टी होइन । तर …. आजको मितिमा म यो संसदमा प्रश्न गर्ने क्षमताले आत्महत्या गरिरहेको बडा कारुणिक दृश्य हेरिरहेको छु । सत्ताको कित्ताबाट कोहि एकजनाले हिम्मत गर्लान् र मेरो देशले कसको सिमा कहाँ मिचेको छ ? भनेर प्रश्न गर्लान् भनेको त सभामुख महोदय म लज्जित छु- उल्टै कतिपय सांसद मित्र नेपालले भारतको सिमा मिचेकै हो भनेर पुष्टि गर्न न्वारानदेखिको बल लगाएर दौडिएका छन् । त्यस्तो हर्कत गर्ने मित्रहरूलाई वीर भक्ती थापाको आत्माले धिक्कार्ला कि नधिक्कार्ला ? यो साेधेर म उसै दुखी मनहरुलाई थप दुखित बनाउन चाहन्न ! बरु सभामुख महोदय , म यो संसद अब यहि बिषयमा रुमल्लिएर बस्नुहुन्न भन्ने परिपक्व र जिम्मेवार दायित्वतर्फ सबैको बडा नम्रतापुर्वक ध्यानाकर्षण गराउन चाहन्छु । यो बर्षको बजेट उपरको छलफल बाँकी छ । नेपाली जनताका अन्य कैयन जिवन्त मुद्दामा छलफल गर्नुछ ।
प्रधानमन्त्रीजीलाई संसद नचाहिएला, तर प्रतिपक्षलाई संसद चाहिएको छ । फेरि कुनैदिन छापामार शैलीमा प्रधानमन्त्रीजि फेरि आउनु होला, तर म उहाँलाई अब खोज्न चाहन्न । तर प्रधानमन्त्रीले बोलेकै कुरामा मात्रै अल्मलिएर , गरिमामय संसदको अमुल्य समय खेर फाल्नुहुन्न भन्ने जिम्मेवारीबोध गर्ने कार्यमा कमजोरी गर्न पनि चाहन्न । `नेपालले पनि भारतको सिमा मिचेको छ´ भन्ने प्रधानमन्त्रीको अभिव्यक्ति गैह्र जिम्मेवारपुर्ण थियो । आपत्तिजनक थियो र लज्जास्पद अभिव्यक्ति थियो । तर यदि हाम्रो संसदमा लगातार ५ दिनसम्म ५ जना अन्तर्राष्ट्रिय पर्यवेक्षक राखेर छलफल गरियो भने ५ दिनपछि तिनले निष्कर्षमा पक्कै लेख्नेछन् – नेपालले भारतको सिमा मिचेको कुरा सत्य हो रहेछ । किनकी सत्ताको टेपले टालिएका ओठहरु, सत्यको पक्षमा बोल्न सक्दैनन् ।
सबै सांसद बोल्ने हो भने ती बिदेशी पर्यवेक्षकहरुले लेख्नेछन्- नेपालको संसदको बहुमत सांसदले स्विकारेका छन् `नेपालले भारतको सिमा मिचेकै हो´ । किनकी `मिचेको होईन´ भन्ने संख्या त संसदमा अल्पमतमा छ । बहुमत सांसदले त्यो स्विकारेको लज्जास्पद दृश्य झल्झली सम्झन्छु सभामुख महोदय म – त्यो दिन जब प्रधानमन्त्रीजिले त्यस्तो बोल्नुभयो, तब रास्वपाका माननीय सदस्यहरुले समर्थनमा ठोक्नुभएको थियो टेबुल- ड्याङ / ड्याङ / ड्याङ गरेर । माफ पाउँ सभामुख महोदय, मैले यो जन्ममा देखेको अहिले सम्मकै सबैभन्दा लज्जास्पद , र सबैभन्दा दु:खद दृश्य थियो त्यो !!
काठमाडौं : उच्च अदालत पाटनमा व्यवसायी दीपक भट्टसहित चार जना व्यवसायीविरुद्ध बैंकिङ कसुरसम्बन्धी मुद्दा दायर भएको छ । सरकारी वकिल कार्यालयले...
काठमाडौँ : प्रतिनिधि सभाको आजको बैठकले ‘नेपाल राष्ट्र बैंक (तेस्रो संशोधन) विधेयक, २०८३ माथि विचार गरियोस् भन्ने प्रस्ताव सर्वसम्मतिले स्वीकृत...
काठमाडौँ : प्रधानमन्त्री वालेन्द्र शाहका राजनीतिक सल्लाहकार असिम शाहको संयोजकत्वमा गठित ‘संविधान संशोधन बहसपत्र’ तयारी कार्यदलले आज पूर्वप्रधानमन्त्रीहरू पुष्पकमल दाहाल...
