एमसीसी देशको पक्षमा रहेको काँग्रेस कार्य सम्पादन समितिकाे निश्कर्ष

काठमाडौं । नेपालमा अमेरिकी सहयोग परियोजना (एमसीसी) का पक्ष र विपक्षमा बहस भइरहेका बेला नेपाली काँग्रेसको केन्द्रीय कार्य सम्पादन समितिको बैठकले अमेरिकी आर्थिक सहयोग परियोजना (एमसीसी) संसद्‍बाट अनुमोदन गर्नुपर्ने निश्कर्ष निकालेको छ ।

बिहीबार पार्टी कार्यालय सानेपामा बसेको कांग्रेस केन्द्रीय कार्यसम्पादन समिति बैठकले एमसीसी देशको पक्षमा रहेको निश्कर्ष निकाले हो ।

बैठकमा सभापति देउवाले सरकार एमसीसी अनुमोदनको पक्षमा रहेको सबै सदस्यहरुलाई जानकारी गराउँदै एमसीसीले देशमा आर्थिक वृद्धिका बाधा पहिचान गरी मुख्य प्राथमिकताका क्षेत्रमा सहयोग गर्ने बताए ।

सभापति एवम् प्रधानमन्त्री देउवाले एमसीसीको ५० करोड डलर अनुदान र नेपाल सरकारको १३ करोड डलर गरी ६३ करोड डलरमा ३१२ किमि उच्च क्षमता (४०० केभी) को प्रसारण लाइन, ३ सबस्टेसन र नेपाल–भारत सीमापार प्रसारण लाइन अनि ९९ किमि सडक स्तरोन्नतिमा सहयोग रहने बताएका थिए ।

एमसीसी नितान्त पनि विद्युत र बाटोको लागि भएकाले विभिन्न राजनीतिक दलहरूले जनतामा भ्रमको खेती गरेको आरोप लगाउँदै पूर्व अर्थमन्त्री डा। रामशरण महतले जनतालाई एमसीसीका बारेमा बुझाउन आवश्यक रहेको बताए ।

डा. महतले एमसीसी एमसीसी नेपालका लागि राम्रो अनुदान भएकोले गुमाउन नहुने धारणा राख्दै देशमा रोजगारीको सृजना गरी समृद्ध नेपाल बनाउन सहयोग पुग्ने बताए ।

एमसीसी परियोजनामार्फत काठमाडौें लप्सीफेदीबाट नुवाकोटको रातमाटे, दमौली हुँदै नवलपरासी र सुनवलसम्म ३१२ किमि प्रसारण लाइन निर्माण हुनेछ ।

त्यस्तै परियोजना अन्तर्गत रातमाटे, दमौली र बुटवलमा तीन सबस्टेसन निर्माण गरिनेछ।