- अनामनगर काठमाडौँ
- infobikalpa21@gmail.com
मकवानपुर : बागमती प्रदेश सरकारको आगामी आर्थिक वर्ष २०८३/८४ को वार्षिक नीति तथा कार्यक्रम प्रदेशसभाबाट बहुमतले पारित भएको छ। नीति तथा कार्यक्रममाथि दर्ता भएका संशोधन प्रस्तावहरू अस्वीकृत भएपछि हिजो मंगलबार सरकारको प्रस्तावित नीति तथा कार्यक्रम पारित भएको हो।
मुख्यमन्त्री इन्द्रबहादुर बानियाँले प्रदेशसभामा प्रस्तुत गरेको नीति तथा कार्यक्रममाथि दुई दिनसम्म विस्तृत छलफल भएको थियो। छलफलमा उठेका प्रश्न र जिज्ञासाको जवाफ दिँदै मुख्यमन्त्री बानियाँले आगामी असार १ गते प्रस्तुत हुने बजेट नीति तथा कार्यक्रमकै मार्गदर्शनअनुसार तयार गरिने बताए।
उनले आगामी बजेट समानुपातिक, निष्पक्ष, पारदर्शी तथा जनमुखी हुने दाबी गर्दै प्रदेशका सबै क्षेत्र र समुदायलाई समेट्ने गरी स्रोत–साधनको वितरण गरिने स्पष्ट पारे। प्रदेश सरकारको विकास दृष्टिकोणलाई कार्यान्वयनमा लैजान नीति तथा कार्यक्रम महत्वपूर्ण आधार बन्ने उनको भनाइ थियो।
यसअघि प्रदेश प्रमुख दीपकप्रसाद देवकोटाले जेठ १२ गते प्रदेशसभामा सरकारको नीति तथा कार्यक्रम प्रस्तुत गर्नुभएको थियो। त्यसमाथिको छलफल सोमबारदेखि सुरु भएको थियो।
नीति तथा कार्यक्रममाथि नेकपा (एमाले)का सचेतक रत्नप्रसाद ढकाल, सांसद युवराज चौलागाईँ, राष्ट्रिय प्रजातन्त्र पार्टीकी लक्ष्मी घिमिरे तथा नेकपाकी सांसद सुष्मा भुजेलले संशोधन प्रस्ताव दर्ता गरेका थिए। उनीहरूले नीति तथा कार्यक्रमका केही विषय थप परिमार्जन गर्नुपर्ने धारणा राख्दै छुट्टाछुट्टै संशोधन प्रस्ताव पेश गरेका थिए। तर ती सबै प्रस्ताव प्रदेशसभाको बहुमतबाट अस्वीकृत भए।
छलफलका क्रममा विभिन्न दलका सांसदहरूले नीति तथा कार्यक्रमका केही शीर्षक तथा प्राथमिकतामाथि प्रश्न उठाएका थिए। साथै आगामी बजेट निर्माण गर्दा नीति तथा कार्यक्रममा उल्लेख गरिएका प्रतिबद्धता र प्राथमिकतालाई आधार बनाउन सुझाव दिएका थिए।
प्रदेशसभामा प्रतिनिधित्व गर्ने विभिन्न राजनीतिक दलका सांसदहरूले नीति तथा कार्यक्रममाथि आफ्नो धारणा राखेका थिए। दुई दिनसम्म चलेको छलफलमा दर्जनौं सांसद सहभागी भएका थिए।
नीति तथा कार्यक्रम पारित भएसँगै अब प्रदेश सरकारले आगामी आर्थिक वर्षको बजेट तयारीलाई अन्तिम रूप दिने भएको छ। सरकारले प्रस्तुत गर्ने बजेटमार्फत विकास, पूर्वाधार, रोजगारी, कृषि, शिक्षा र स्वास्थ्य क्षेत्रका कार्यक्रम कार्यान्वयनमा जोड दिने अपेक्षा गरिएको छ।
प्रदेशसभा उपसभामुख अप्सरा चापागाईँले बैठकको कार्यसूची सम्पन्न भएपछि अर्को बैठक जेठ ३१ गते अपराह्न १ बजे बस्ने गरी स्थगित गरेकी छन्।
काठमाडौँ : साफ महिला च्याम्पियनसिपअन्तर्गतको सेमिफाइनलमा नेपाल बंगलादेशसँग पराजित हुँदै प्रतियोगिताबाट बाहिरिएको छ । बुधबार सम्पन्न प्रतिस्पर्धात्मक खेलमा नेपाल २-१...
काठमाडौं । भारत भ्रमणमा रहेका राष्ट्रिय स्वतन्त्र पार्टी (रास्वपा) का सभापति रवि लामिछानेले भारतीय प्रधानमन्त्री नरेन्द्र मोदीसँग भेटवार्ता गरेका छन्...
काठमाडौं । महानगर यातायात प्रा.लि.ले आफ्नो सेवा विस्तार गर्दै १६ वटा नयाँ विद्युतीय बस सञ्चालनमा ल्याएको छ। बुधबारदेखि काठमाडौं उपत्यकाको...
